Кажне ийын 10 декабрьыште Марий тиште кечым палемдена. Тений тудым эртарыме амал дене ныл кугу мероприятий лийшаш: Юл кундемысе калык-влакын национальный книгашт дене палдарыше онлайн-фестиваль, марий тӱвыра форум, йыргешке ӱстел, шанче-практик конференций да «Марий Элын идалыкысе книгаже – 2020» республиканский конкурс. Неле чер эпидемийлан кӧра нуно офлайн да онлайн форматыште эртат.
Марий Тиште кече 8 декабрьыште «Марла чын возена» тӱшкан возымо диктант дене почылтеш. Ты просветительский акций кандашымше ий почела эрта. Тушко Марий Элыште илыше-влак веле огыл, Российысе регионла гычат ушнат. Мероприятий Марий кугыжваныш университетын тунемме-лабораторий корпусыштыжо лиеш.
8-9 декабрьыште С.Г.Чавайн лӱмеш национальный библиотекыште Юл кундемысе калык-влакын национальный книгашт дене палдарыше онлайн-фестиваль почылтеш. Тудо Марий кундемнан 100 ияш лӱмгечыжлан пӧлеклалтеш. А 10 декабрьыште библиотекын nbmariel.ru сайтыштыже «Марий Элын идалыкысе книгаже – 2020» IХ республиканский конкурс торжественно иктешлалтеш.
9 декабрьыште республикысе Марий тӱвыра рӱдер М.Шкетан лӱмеш национальный кугыжаныш драме театрыште регион-влак кокласе кӱкшытан марий тӱвыра форумым кокымшо гана эртара. Тушко шанче, образований, тӱвыра, образовательный учреждений пашаеҥ, студент, тунемше, мер организаций-влакын ончылъеҥышт чумыргат.
Форумын программыштыже:
– Россий сӱретче-влак ушемын еҥже, Марий Элын Олык Ипай лӱмеш кугыжаныш премийыжн лауреатше, «Марий Эл Республикын самырык талантше-влак» премийын лауреатше Мария Клюкинан «Марий йомак тӱня» персональный, «Калык – Марий Элын поянлыкше» фото-выставке-влакым почмаш, «Марий ӱдырамаш Кугу сарын тулыштыжо» фотоальманахын да Марий Эл калык писатель Леонид Яндаковын «Сар кыша» книгажын презентацийже-влак;
– Марий Эл Республикысе шочмо йылмым туныктышо-влакын ассоциацийыштын советшын кумдаҥдыме заседанийже;
— «Марий тиштын ончыкылыкшо» почмо мутланымаш да «Марий туныктымо книга – марий тиштын памаш шинчаже» семинар; – «Мый марла ойлем» акций; – «Мунло» республик кӱкшытан интеллектуальный марафон; – М.Шкетанын «Ачийжат-авийжат» пьесыж почеш шындыме спектакль.
10 декабрьыште МарНИИЯЛИ-ште «Айста марла чын возена да кутырена» научно-практический семинар эрта.
С.НОСОВА
