Марий Элыште 684,7 тӱжем еҥ ила, ты чот гыч 51,4 процентше пашам ыштен кертшылан шотлалтеш. Таче 331 тӱжем (94 процент) гражданин пашам ышта. 20 тӱжем еҥ пашашке официально, формально пурен огыл. Тиде тӱҥ шотышто торговльо, ялозанлык, общественный питаний, ургымо производство, быт услугым пуышо, пассажирым шупшыктышо пашаеҥ ден чоҥызо-влак улыт.
Таче калыклан паша верым ситарыме службо, налог орган, бюджет огыл кугыжаныш фонд, паша инспекций, прокуратур-влак, МВД формально огыл пашам ыштыме ваштареш регион кӱкшытыштӧ веле огыл, муниципалитет кӱкшытыштат кучедалыт. Тений Йошкар-Олаште, Волжскышто, Медведево, У Торъял, Морко да моло районлаште пашам пуышо 18 еҥым тергыме да паша ойпидышым ыштыдымылан але кӱлеш семын оформитлыдымылан чылаже 210 тӱжем теҥге кугыт штрафым пуымо.
Шарныза: пашам пуышо да пашаеҥ кокласе ойпидышым пашам ышташ тӱҥалме икымше кум кечыште ыштат. Паша законодательствым пудыртымо шотышто информацийда уло гын, Марий Эл Республикын Кугыжаныш паша инспекцийышкыже (Йошкар-Ола, Ленин проспект, 24-ше А пӧрт, 120-шо А кабинет (вӱргече да кугарня еда, 8 гыч 12 шагат марте) вуйым шийын кертдыда. «Шокшо линий» телефонат уло: 8 (8362) 45-16-14; 8 (8362) 41-40-77.
М.ИВАНОВА.
