Йошкар-Оласе следственный изоляторын ӱдырамаш ушемже шыжын пытартыш кечылаштыже пашаеҥ-влак коклаште ойыртемалтше пайремым ышташ мутланен келшен. Тыге шукерте огыл тыште «Шыже когыльо» лӱман конкурс эртен.
Конкурсын участникше-шамыч, а тушко учрежденийын чыла отделже ден службыж гыч пашаеҥ-влак ушненыт, мом-гына кӱэшт конден огытыл?! Иктешлен ойлаш гын, кӧн фантазийже молан ситен, тугайым ямдылен. Туге гынат эн шуко йӱкым поҥго гыч ыштыме «Шыжын кугыжаже» когыльо поген. Тудым охрана отделын пашаеҥже Анастасия Рыбакова кӱэштын. Тудак конкурсышто сеҥышыш лектын.
Мутлан, режим да надзор отделын изирак инспекторжо Любовь Савченко ойыртемалтше шыже корзиҥгам кӱэштын. «Шыже мотор» номинацийыште тиде когыльым калык жюри эн сайлан шотлен.
Конкурсышто тыгак эн кугу когыльымат палемденыт. Тудым ямдылымаште иканаште икмынярын тыршеныт. Тудо тӱрлӧ кӧргашан лийын. Тыге тиде когыльо «Шыже поппури» номинацийыште сеҥен.
Организатор-влак тылеч поснат ятыр оҥай номинацийым шонен луктыныт да кажныштыже кӧм-гынат палемденыт, палдара Марий Элысе УФСИН-ын пресс-службыжо.
Л.КАМАЛЕТДИНОВА
А.Канатеевын фотожо
