Волжский район Пӧтъял кыдалаш школын командыже Марий Элын чапшым всероссийский президент спорт таҥасымаште арален. Элнан тӱрлӧ кундемже гыч 65 команде коклаште лу эн тале коклаш логалын.
Тений ты таҥасымашат онлайн йєн дене эртен. Команде эстафетыште кумшо верыш лектын, теорийым палымаште латшымше лийын, а творчество конкурсышто – 39-ше.
– Лач творческий конкурсшак кажне президент состязанийыште командым шеҥгек шупшылеш. Тидын шотышто мыланна полыш кӱлеш, – манеш Пӧтъял кыдалаш школышто ятыр ий физкультурым туныктышо А.Семёнов.
Мут толмашеш, 22 ноябрьыште Альберт Аркадьевич 60 ияш лӱмгечыжым палемден. Тунемше, род-тукымжо да йолташыже-влакын шокшо саламлымашышкышт меат ушнена да ончыкшымат пеҥгыде тазалыкым, таҥасымашлаште сай результатым, творческий шӱлышым тыланена.
– Мемнан ӱдыр-рвезе-влак молгунамсе семынак писе, чолга, пӱсӧ уш-акылан да мастар улмыштым ончыктеныт. Икмыняр ий всероссийский таҥасымаш Шем теҥыз воктене эртаралтын гын, коронавирус черын шарлен кертме лӱдыкшылан кӧра шке кундемыштак таҥасаш да ямдылыме программым видео дене колташ логалын, – ешарыш физкультурым туныктышо. Чумыр наламаште молодец улыт. Мемнан верч тургыжланыше, мыланна полшышо-влаклан моткоч кугу тау.
Лишыл жапыште Марий Элын чапшым ӱдыр-рвезе-влаклан кубокым, медальым, дипломым, сертификатым, шарнымашан футболкым, тыгак кажныштлан спорт формым кучыктышаш улыт.
Командыште лийыныт: Кирилл Афанасьев, Илья Фёдоров, Эмиль Григорьев, Максим Тимофеев, Анна Осипова, Алина Тарасова, Олеся Чепакова, Людмила Андреева.
Е.ЭШКИНИНА
Авторын фотожо
