19-21 ноябрьыште Йошкар-Олаште «Шӱвыр» фестиваль да калык семӱзгар дене шоктышо оркестр ден ансамбль-влакын «Тӱрлӧ сынан Россий» фестиваль-конкурсышт эртен. Тудым икымше кечын Э.Сапаев лӱмеш опер да балет академический театрыште почмо. Лач тиде кечын полатыште тӱрлӧ семӱзгарын йӱкшӧ торашке шергылтын.
Фестивальым почмаште тӱвыра, савыктыш да калык паша шотышто министрын алмаштышыже Михаил Матвеев, В.Д.Поленов лӱмеш Россий калык усталык пӧртын музык искусство пӧлкажым вуйлатыше, Россий культурын сулло пашаеҥже, «Тӱрлӧ сынан Россий» фестиваль-конкурсын художественный вуйлатышыже Анатолий Цеп лийыныт.
Республикнан 100 ияш лӱмгечыж вашеш эртаралтше кок мероприятийышкыжат ушнышо-влакым Михаил Иванович саламлен да тиде амал дене Марий Эл вуйлатыше Александр Евстифеев деч пурышо саламлымашан серышым лудын пуэн.
– Тыгай фестиваль-влак творческий шӱлышан еҥ-влак дене вашлийме, икте-весын мастарлыкшым ужын кертме площадкыш савырненыт. Тиде амал дене нуно Российыште веле огыл, а тӱнямбалне илыше калык-влакын ойыртемалтше семӱзгарышт дене палыме лийын кертыт. Фестиваль-влакым эртарыме дене ме кушкын толшо тукымым калык семӱзгарлан кумылаҥдена да нунын дене шокташ кӱлмым ушештарена, – возымо серышыште.
(Умбакыже газетыште лудаш темлена)
Алевтина БАЙКОВА
М.Скобелевын фотожо
