Национальность-влак шотышто федеральный агентстве самырык-влаклан «Диалог культур» конкурсым увертарен.
Тудо тӱрлӧ национальностян ӱдыр-рвезе-влак коклаште тӱвыра гоч келшымаш кылым пеҥгыдемдымашке виктаралтын. Конкурс программе кок кужытын эртаралтеш: ойырен налме да образовательный. Конкурсыш ушнаш шонышо-влак национальный вургемым чиен, кум минуташ художественный номерын видеопрезентацийжым войзыман роликым 9 гыч 22 ноябрь марте www.dialogculture.ru конкурсын официальный сайтышкыже вераҥдышаш улыт. Тыгак национальный тематикылан сӱретым (изобразительный искусствын традиционный техникыжлан эҥертен) ышташ лиеш.
Конкурслык номинаций-влак тугай улыт:
— декоративно-прикладной искусство (але калык кидмастар, национальный быт арверым ыштымаш);
— спортын национальный видше-влак (але модмаш-влак, индивидуальный але тӱшкан модмо);
— Национальный костюм (але тудым ыштыме, сылнештарыме, нумалме ойыртемалтше процесс);
— национальный кочкыш (ойыртемалтше рецепт, тудым ямдылыме да кочмо ойыртем-влак);
— национальный муро (шочмо йылме дене але рушла йылмыш кусарыме, семӱзгар дене йоҥгалтарымаш, пьесе, национальный семӱзгар дене палдарымаш);
— национальный куштымаш ( историйже, ойыртемже, значенийже да т.м.);
— национальный фольклор (преданий, такмак, анекдот, йомак, эпос, аза малтыме муро, йӱла, тыгак кызытсе жаплан келыштарымат).
Ойырен налме турышто жюри, а тушко тӱнямбал кӱкшытыштӧ палыме мурызо, куштызо, продюсер, телевӱдышӧ, мер пашаеҥ-влак пуреныт. Эн сай 150 пашам проектын образовательный программыжлан палемдат. Тудо 24 гыч 28 ноябрьыште онлайн-форматыште эрта. Проектын участникше-влаклан тыгак шкем кушташ полшышо эстафетым, челленджым, лекцийым, тӱрлӧ оҥай еҥ дене шуко вашлиймашым, кугыжаныш национальный политике, вашкыл
психологий, этнопсихологий шотышто ятыр шагатым, онлайн йӧн дене театр ден тоштерлаш экскурсийым эртарат.
С.НОСОВА
