Йошкар-Олаште вераҥдыме кок скульптур Туту.ру поездке да путешествий сервисын ямдылыме ТОП-100 рейтингышкыже логалын.
Сандене «Й» буквалан да «Йошкин пырыс» памятник-влак «скульпТУТУра» (https://art.tutu.ru/) всероссийский конкурсын финалышкыже ушнат. Тушто кугыжаныштына эн ойыртемалтше шарныктыш-влакым ойыраш тӱҥалыт. 100 участник гыч 10 сеҥышым палемдат. Марий Эл гыч скульптур-влакым 24-30 ноябрьыште кудымшо лу претендент коклаште аклаш да ойырат. Но меат шкенан скульптур-влаклан йӱкым пуэн да нуным сеҥышыш лукташ полшен кертына. А тидлан 24-30 ноябрьыште, https://vk.com/tu_tu_ru сайтыш пурен, Туту.ру группышто йӱклыман. Могай памятник шукырак йӱкым пога, тудо сеҥшыш лектеш.
Брендыш савыраш шонена гын…
Марий Элыште илыше-шамычат «Топ-1000» Российысе локальный тӱвыра да турист бренд-влак» конкурсыш ушнен кертыт. Тыге ме шкенан республикыштына ыштен лукмо сату-влакым брендыш савыраш полшена. Живоенаследие.рф интерактивный платформышто РФ–н общественный палатыже, Руш географический обществе, Старатегический инициативе агентстве, Гостеприимстве индустрийын общенациональный ушемже иквереш Президент грант фондын полшымыж дене тыгай конкурсым эртарат. Тыге Россий кумдыкысо регионлаште улшо турист обьект, образ, лӱмлӧ еҥ, дате-влак нерген увер иквереш чумыралтшаш. Ончыч 500 тыгай брендым проектын жюриже ойырен да топ-500 порталыш вераҥден. Ынде нунын кокла гыч 100 эн сайжым ойырат. Регистрироватлалтше кажне еҥ (мутлан, краевед, туризм шотышто эксперт, турист бизнесын, турист-увер рӱдерын, кугыжаныш але верысе кучемын еҥышт) шкен темлымашыжым ыштен, ты але вес ойыртемалтше вер, объект нерген ешартыш уверым темлен кертеш. Тыгай рейтингым ыштыме дене пырля, ешартыш онай уверым пуртышо-влакым организатор-влак пӧлек дене палемдаш тӱҥалыт.
Организатор-влакын шонымышт почеш, ты спискыш кумда масштабыште турист-влакым кумылаҥден кертше бренд-влак логалшаш улыт. А нуно вара ты але вес кундемлан экономике да тӱвыра сферыште вияҥаш полшаш тӱҥалыт.
Конкурс 4 ноябрьыште тӱҥалын да 2021 ий 15 январь марте шуйна.
«Российын тамже»
Российсе Ялозанлык министерстве «Вкусы России» национальный конкурсым икымше гана увертарен.
Тушко элнан 79 регионжо гыч 500 брендым темлыме. Кажныже министерствын нунылан вияҥшаш полшышо программыштыже участвоватлаш тӱҥалыт. Эн ончыч нуным ыштен лукшо предприятий-влакым Россельхозбанкын «Своё. Родное» цифр платформышкыжо вераҥдат, молан манаш гын лач ты банк конкурсын партнёржо. Тидыже предприятий-шамычлан шке сатуштым ужалаш клиент-влакым муаш полшышаш. Тылеч посна компаний-влак турист услугымат темлен кертыт. Кажне гаяк брендше эше конкурсын «Загляните на огонек» номинацийыште участвоватла. А туштыжо брендын туристлан келшен толмыжым аклат.
Каласен кодыман, Марий Эл гыч ты конкурсыш латвич сату темлалтын. Нунын коклаште сакыр ложашыш варымантурнявӧчыж, Иван-чай, «Сернурская легенда», «Комавел» сыр-влак, «Йошкин кот» мармелад, каза шӧр гыч мороженый, тӱрлӧ йогурт, марий чодырасе икмыняр емыж, «Алексеевская» ветчина, имне шыл гыч кызылык, подкогыльо, «Марий Отар» мӱй да курыкмарий велысе пакчасакса…
Сеҥыше-влакым декабрьыште эксперт комиссий ойыра. Эшежым 19 ноябрь гыч 2 декабрь марте проектын сайтыштыже меат шкенан бренд-влак верч йӱклен кертына.
У сыным пуынешт
«Здоровая жизнь» компаний» ООО Йошкар-Оласе Тарханово микрорайонысо паркым тӱзаташ келшен толшо эскиз концепцийлан конкурсым увертарен.
Тидын нерген соцкыл лаштыклаште увер уло. Конкурсын условийже почеш участник-влак кузе ты паркым экопаркыш савыраш полшыш проектым темлышаш улыт. А тудо таче 12 гектар кумдыкым айла. Совет жапыште «ВЛКСМ-ын 50 ияш лӱмгечыже лӱмеш» парк маналтын. Кеч пытартыш жапыште тудын сынже сай велке вашталтын, тӱзаталтын гынат, лиеш эше мом сӧрастараш да тушто вераҥдаш.
Конкурсыш архитектор, проектировщик, ландшафт дизайнер, профильный вузласе студент, моло специалист-шамычат ушнен кертыт. Приз фонд 1 миллион теҥгеш шуэш. Сеҥышыш лекше пелыж нарым налшаш. Конкурс иктешлалтмеке, проектым илышыш шыҥдараш пижыт. Тидын нерген компанийын вуйлатышыже Александр Мурашко увертарен.
С.НОСОВА
