Марий Эл правительствын граншылан кӧра ынде Йошкар-Оласе авиационно-спортивный клубын шке самолётшо уло.
Сеҥен налме грант Россий ДОСААФ-ын Йошкар-Оласе авиационно-спорт клубшын членже-влаклан ончычсо шонымашыштым илышыш шыҥдараш моткоч сай йӧн. Уке гын кызыт марте спортсмен-шамыч самолётым арендоватленыт.
Грант кум миллион теҥге лийын, эше кум милион теҥгеже Россий ДОСААФ-ын рӱдӧ советшын да Марий Элысе региональный отделенийын бюджетышт гыч ойыралтын. Тиде окса дене АН-2 самолётым олмыктеныт, пилотым, парашютист-инструктор-влакым туныктеныт.
Йошкар-Оласе аэропортышто Марий Элын вуйлатышыже А.Евстифеев клубын еҥже-влакым тыгай кугу пӧлек дене саламлен да, ындыжым шке самолёт дене спортсмен-влаклан у кӱкшытыш шуаш ямдылалташ, самырык тукымым авиационный да парашют спортлан кумылаҥдаш сайрак лиеш манын палемден.
Олмыктымо техникым ончен лекме деч ончыч регион вуйлатыше Россий ДОСААФ-ын Йошкар-Оласе авиационно-спортивный клубшым ыштымылан 85 ий темме лӱмеш ямдылыме «Влюблённые в небо» выставке дене палыме лийын.
Россий ДОСААФ-ын Марий Элысе региональный отделенийжым вуйлатыше Вячеслав Тихонов ты видын ончыкылыкшо, тудын кӱлешлыкше нерген каласкален.
– 1935 ийыште элыштына авиацийын, парашют спортын вияҥмышт годым Марий кундемыште икымше гана парашют дене тєрштеныт, – ойлен Вячеслав Тихонов. – Икымше парашютист-влак ӱдырамаш лийыныт. Тунамак спортын ты видше дене кружокым почыныт. Варажым тудо авиационно-спортивный клуб маналташ тӱҥалын. Сар деч ончыч тушто 400 наре специалистым: лётчикым, парашютистым, планеристым, ямдыленыт…
Республикна гыч ятыр спортсмен лӱмлӧ рекордсмен лийыныт. Нунын кокла гыч парашютист Ната Бабушкинам, планерист-влак Тамара Носонова ден Валерий Загайновым, тӱнямбал кӱкшытан спорт мастер Александр Мальцевым, Сергей Ялпаевым, Юнона Цачёвам (Абрамовам) палемдыман. 1956-1996 ийлаште аэроклубышто планер, парашют да самолёт спорт дене 35 утла СССР-ын да Российын спорт мастержым ямдылыме. Чылаже шӱдӧ, тӱжем дене ВДВ-лан парашютистым, курсант-лётчикым ямдыленыт. Нунын кокла гыч шукышт илышыштым авиаций дене кылденыт. Сар жапыште, тыгак тачысе саманыштат, лётчик, парашютист-влакын подвигышт – мемнан историйна. Ме тидын нерген самырык тукымым палдарышаш улына.
В.Тихоновын палемдымыж почеш, спортсмен-шамыч всероссийский таҥасымашлаште кызытат сай результатым ончыктат, но самолёт укелан кӧра тренировкым шот дене эртараш йӧн лийын огыл.
Марий Эл вуйлатыше чылажымат ончен лектын да авиационно-спортклубын специальный техникыже ешаралтме дене у сеҥымаш лийшаш манын.
Республик вуйлатыше парашют спортын вуйлатышыже Ольга Сысоева дене мутланыме деч вара верысе парашютист-шамыч Марий Элын чапшым тӱрлӧ кӱкшытан таҥасымаште аралышаш, шкештым ончыктышаш улыт манын палемден, вет тидлан ынде чыла йӧн уло.
Марий Эл Республик вуйлатышын организаций да
аналитике виктемын уверже негызеш
Е.ЭШКИНИНА ямдылен
