7-15 ноябрьыште Ставрополь крайыште армийыш кайышаш рвезе-влак коклаште эртыше Россий кӱкшытан спартакиадыште Марий Элын командыже кумшо верым сеҥен налын. Икымше – Ханты-Мансийский автономный округын, кокымшо верыште – Москва гыч команде-влак.
Ты гана республикнан чапшым Волжский районын командыже арален. Командыште лу рвезе (И.Александров, С.Ашкельдин, В.Дмитриев, Е.Дмитриев, П.Егоров, Р.Иванов, А.Митяков, М.Михайлов, С.Петров, Н.Ямбаев) лийын.
Сотнур кыдалаш школ гыч шым рвезе вийжым терген. Тыгак икте Памар, кок рвезе Шарача школла гыч лийыныт.
– Ме 23 команде коклаште бронзо призёрыш логалынна. Сотнур кыдалаш школ гыч Стас Петров 60 да 100 метр кужытыш куржталмаште икымше, кужытыш тӧрштымаште кумшо верым налын. Тудо чыла участник коклаште нылымше верыш лектын, а Всеволод Дмитриев, лу видыште личный зачётышто эн шуко очком поген, Российыште 230 участник кокла гыч икымше верыш лектын, – палемдыш Сотнур кыдалаш школышто ОБЖ-ым туныктышо О.Иванов. – Тыгак Алексей Митяков лу эн тале коклашке логалын, кандашымше верым налын. Россий кӱкшытыштє моткоч сай вер.
Икманаш, рвезе-влак чыла вий-куатыштым, моштымыштым кучылташ тыршеныт, а тидланже, мутат уке, тренер-преподаватель-шамычын полышышт нимучаштыме. Ий гыч ийыш ямдылалтмышт арам лийын огыл.
Палемдыман, 2020 ийыште республикыште военно-патриотический конкурсышто Волжский муниципал районын командыже икымше верым налын. А Шарача кыдалаш школышто ОБЖ-ым туныктышо В.Иванов ден Сотнур кыдалаш школышто ятыр ий ОБЖ-ым туныктышо О.Ивановын воспитанникышт республик, Россий кӱкшытан военно-патриотический мероприятийлаште ик гана веле огыл таҥасеныт да сеҥыше радамыш логалыныт. Призёр радамыш логалмыж дене командым шокшын саламлена да ончыкшымат сай результатым ончыкташ тыланена.
Е.ЭШКИНИНА
