10 ноябрьыште правительстве пӧртыштӧ регион вуйлатыше Александр Евстифеевын Марий Элын элкӧргӧ паша министрже Сергей Волчков дене пашаче вашлиймашыже лийын.
Нуно республик кумдыкышто правопорядкым эскерыме шотышто пашам иктешленыт, еҥ-влакын да юридический лица-шамычын санитар йодмашым шуктышашт верч полицийын да Роспотребнадзорын Марий Элысе управленийжын пайдале вашкылышт нерген мутланеныт.
Александр Евстифеев палемден:
— Ме Тендан дене пайрем кечын вашлийына. Тиде ий элкӧргӧ паша министерствыште тыршыше-влакын мероприятийлашке ушнымыштым йодшо кугу событий-влаклан поян лийын да нуно кӱлеш кӱкшытыштӧ эртеныт.
Марий Элын элкӧргӧ паша министрже Сергей Волчковын ойлымыж почеш, коронавирус инфекций дене кылдалтше неле ситуацийым ончыде, республикыште этноконфессиональный сӱрет ласка, тӱшка тума лийын огыл. Мыняр калык илымым шотыш налын, ПФО-што да Российыште таҥастарен ончалаш гын, пытартыш жапыште Марий Элыште преступлений ик эн шагал ышталтеш.
Вашлиймаште тыгак корнылаште аварий шагалрак лияш тӱҥалмым палемденыт.
— Корно туткарлаште еҥ-влак сусыргыман ДТП-н, тушто колышо-влакын чотышт шагалемын, — каласен министр.
Тыгодым тудо увер технологийым кучылтман преступлений-влак ваштареш мом ышташ лийме шотышто йодышын ик эн пӱсӧ улмыжым палемден. Тидын ваштареш кучедалшашлан министерствыште специализироватлыме подразделенийым ыштыме. Но шукыжо еҥ-влак денат кылдалтеш: мошенник-шамычлан нимогай данныйым пуыман огыл, манын Сергей Волчков.
Профессиональный пайрем кечын Александр Евстифеев Сергей Волчковым да министерствын коллектившым Элкӧргӧ паша орган-влакын пашаеҥыштын кечышт дене саламлен да тазалыкым, сеҥымашым, умбакыже профессиональный кушмашым тыланен.
Марий Эл Республикым вуйлатышын организаций да аналитике виктемжын уверже-влак негызеш
Л.КАМАЛЕТДИНОВА ямдылен
