Марий Эл образований да науко министр Наталья Адамова «Большая перемена» всероссийский конкурсын финалистше-влак дене вашлийын (снимкыште).
Таҥасымашын пытартыш этапше тений 31 октябрь гыч 5 ноябрь марте «Артек» тӱнямбал йоча рӱдерыште эртен. Тушто мемнан республикын чапшым Диана Москвина (Йошкар-Оласе 28-ше №-ан лицей), Анастасия Исакова (Йошкар-Оласе 15-ше №-ан школ) араленыт, а Евгения Брылякова (Бауман лицей) мюзиклын участникше лийын.
Образований да науко министр дене вашлиймаште нуно пелефиналыште да финалыште моштымашым ончыктымышт нерген каласкаленыт. Наталья Адамова палемден: нине ӱдыр-влаклан кӧра респуликысе школлаште тунемше-влак ты кугу конкурс нерген шукырак палаш тӱҥалыт да тушко ушнаш кумылаҥыт манын ӱшаныме шуэш.
«Образований» национальный проект дене келшышын, 2021 ий гыч «Большая перемена» всероссийский конкурс школласе 8-10-шо класслаште тунемше-влаклан кажне ийын эртаралташ тӱҥалеш. Тений тушто еҥыше-влакым 200 тӱжем теҥге гыч ик миллион марте окса премий дене палемденыт., Тыгак чыла финалистлан «Артек» тӱнямбал йоча рӱдерыш путёвкым, фирменный курткым, худим, сумкам да Сбербанкын картыжым кучыктеныт. Тидын деч посна Росийысе 20 эн сай школлан 2 миллион теҥге кугытан окса полыш пуалтын.
Г.КОЖЕВНИКОВА
