2019 ий тыгаяк пагыт дене таҥастарымаште тений индеш тылзе жапыште Российыште аза колымо чот 13 процентлан иземын, увертара Росстат.
Тидын шотышто поснак сай сӱрет Коми ден Марий Эл республиклаште, Камчатский крайыште, Саратов ден Ленинград областьлаште палдырна.
«Индеш тылзыште аза колымо чот 13 процентлан иземын – 2019 ий январь-сентябрьысе 5568 случай гыч 2020 ий январь-сентябрьысе 4845 случай марте», — ойлалтеш данныйыште.
Сентябрьыште ик ияш марте йоча-влакын колымо чотышт 9,1 процентлан але 55 случайлан иземын: 2019 ий сентябрьыште 596 аза колен, 2020 ийыште – 541.
Тыгеже тиде показатель сентябрьыште элнан 39 регионыштыжо иземын. Идалык тӱҥалтыш гыч тыгай сӱретым 58 регионышто рашемдыме.
«Аза колымо эн изи чот (80 процентлан, 5 гыч 1 случай марте иземын) дене Марий Эл ден Коми республик-влак ойыртемалтыныт, вара — Камчатский край (66,7 процентлан, 6 гыч 2 случай йотке), Саратов область (63,6 процентлан, 11 гыч 4 случай марте), Ленинград область (57,1 процентлан, 7 гыч 3 случай йотке)», — палдара Росстат.
Ведомствын данныйже почеш, Москваште аза колымо чот 35,2 процентлан (54 гыч 35 случай марте) иземын, Москва областьыште – 40 процентлан (30 гыч 18 случай йотке). Санкт-Петербургышто аза колымо чот 6,7 процентлан кугемын — 15 гыч 16 случай марте.
М.ИВАНОВА
