Йошкар-Олаште илыше-влакын уло ноябрь мучко, кофем йӱын, шкеныштым веле огыл куандарен кертыт, тыге эше йоча-влаклан полшаш йӧнышт лиеш.
Кузе? Оласе заведенийлаште 1 гыч 30 ноябрь марте «Добрый кофе» манмым налмылан тӱлымӧ оксам кофейне-влак йоча хоспислашке кусарат.
Акций идалыкат пеле ончыч Санкт-Петербургышто «Детский хоспис» поро кумылым ончыктымо фондын темлымыж почеш эртаралташ тӱҥалын. Тиде фондын тыршымыж денак ты олаште Российыште икымше йоча хоспис почылтын.
Тений ноябрьыште «Добрый кофе» акцийыш Москва, Санкт-Петербург, Ленинград область, Казань, Екатеринбург, Нижний Новгород, Иркутск область, Краснодар край, Ярославль да моло ола ден регион-влак — кызытеш 350 утла заведений — ушненыт. Да тиде радам эре кушкын толеш.
Йошкар-Олаште тиде кофем «My Gelato Cafe» ден «Сырная лавка» кафелаште налаш лиеш.
Южгунамже илышым вашталташ улыжат ик чашке кофе кӱлеш…
Л.КАМАЛЕТДИНОВА
