Марий Эл - 100

Пайрем шӱлыш садак шижалтын

Коронавирусын пандемийжылан кӧра тӱшка мероприятийым эртараш чарыме гынат, Звенигово районышто Марий Элын 100 ияш юбилейжым да Калыкын икоян лийме кечыжым кумдан палемденыт – молгунамсе семын огыл, а онлайн режимыште!
10 шагат эрдене Звенигово район администрацийым вуйлатыше В.Геронтьев калыкым кок чапле пайрем денат шокшын саламлен. Вара «Тынысын, куанын да йӧратымашын 100 йӱкышт» лӱман пайрем концерт тӱҥалын. Тыштак Звенигово районым вуйлатыше Н.Лабутинан саламлымашыже лийын. «Калыкын ыштыме сымыктышыже» поян арвер выставке ончыкталтын. Провой кундемын чапланыше шочшыжо-влак нерген «Историйым чурийыште ужаш» видеопрезентаций эртен. А Звенигово межпоселенческий библиотке «Ме Марий Элыште илена!» акций кышкарыште «Пайрем дене, шочмо кундем!» саламлымашым ончыктен. 15 шагатлан Провой кундемысе усталык коллектив-шамыч «Тыйын нерген мурем, мыйын Родинем!» концертыш ушненыт. Пайрем кече «Марий кундем — объективыште» лӱман ойыртемалтше фотоконкурс дене мучашлалтын.
Чыла мероприятий организатор-влакын «ВКонтакте» социальный сетьысе сообществылаштышт эртен.

М.ИВАНОВА

Опубликовать в Одноклассники

Добавить комментарий