Марий Эл - 100

Ӧрдыж кундем гыч «Салам!»

Марий Эл Республикылан 100 ий. Лӱмгече вашеш кундемнан унажлан, тораште илыше шочшыжлан мутым пумо шуэш.

Богата Тимар, Тарту (Венгрий):

Пытартыш гана Марий Элыште 2019 ийыште лийынам. Калыкын порылыкшым поснак палемдынем. Кеч-могай йодыш лекмеке эре полышым пуэныт: машина дене кӱлеш верыш наҥгаеныт, поездыш ужатеныт, пукшеныт-йӱктеныт.  Марий-влакын пӱртӱс дене келшен илымыже, шке йӱлам аралымыже чоным ырыкта.

Ялыштат, олаштат мылам келша. Изи Какшан серыште жапым эртараш йӧратем. Марий Эл шотышто пеш йокрокланем.

        Софья Осипова (Шарабуева), Казань:

        Шернур район Шӱдымарий (Куэрсола) ял гыч улам. Илыш корнем Озаҥ олашке наҥгаен, ынде 10 ий утла тушто илем. Шочмо верыш чӱчкыдын толам, вет тушто ава-ача, родо-тукымем илат.

         Мер паша дене кылдалтынам, садлан пытартыш гана Йошкар-Олашке XI марий погыныш Татарстан республик гыч делегат семын толынам. Ӧрдыжте илем гынат, марий улмо чон шижмаш огеш пыте. Марий калык иктыш погынен, ваш-ваш полшен, шке поянлыкышым арален кода манын ӱшанем.
           Уло кумылын Марий Элым 100 ияш лӱмгечыж дене саламлем. Верысе калыклан пеҥгыде тазалыкым, поро кумылым, кӧргӧ вийым, ӱнарым тыланем. Тӱзлане, пелед Марий Эл да марий калык.

        Шайбек Нурбеков, Каинда (Кыргыстан):

Ты олаш да Юл кундем кугыжаныш технологий университетыш логалмемлан пӱрымашым тауштем.

Студент жапыште тӱрлӧ калык гыч лекше шуко ӱдыр-рвезе дене палыме лийынам, марий тӱвырам, историйым шымленам, марла мурашат тунем шуынам, изиш мутланенат моштем. Йырым улшо еҥ-влак, йолташ-влак шочмо сурт деч тораште улам манын йокрокланаш пуэн огытыл.

Республикын районлаштыжат лияш пиал шыргыжын. Лач  Козьмодемьянскыш миен шуын омал. Тидланже ом ойгыро, вет пӧртылаш амал лектын.

Студент илышем курымешлан Марий Эл дене кылдалтын. Иканат ом мондо тиде вер-шӧрым, мыйын кокымшо мӧҥгем.

Марий Эллан эшеат чот вияҥаш тыланем. Тек умбакыжат уна-влакым тыгак шокшын вашлиеш. Мучашлан каласынем: тӱняште узьмак уло гын– тудо марий кундемыште верланен.

Олег Исаков, Сыктывкар:

          Пытартыш гана «Финн-угор калык поянлык» форумышто лийынам. Олан моторлыкшо, кызытсе жап дене тӧр ошкылмыжо турист-влакым шкеж деке кумылаҥда. А еҥже могай ныжылге койышан, поро кумылан!

         Шекланымаш почеш, республике шке кугыжаныш йылмыжым, тӱвыражым арален кодымаште шуко пашам ышта. Южо мероприятийлажым шкаланат эртараш шотыш налынам.

        Евгения Гусоргина, Санкт-Петербург:

Марий кугыжаныш университетын эртарыме «Финн йылме да тӱвыра» курслан кӧра 2016 ийыште икымше гана республикыш логалынам. Тунам, ты олаш пӧртылаш йӧн лийже манын шонен, Йошкин пырысын копажым ниялтенам. Юзо янлык полшен ала-мо, 2017, 2018 ийлаште «Финн-угор калык поянлык» форумыш ушненам.

Олаште шуко йыгыр еҥым вашлийынам, тидыже моткоч ӧрыктарен.

Йӧратен шындыме Йошкар-Олам эше ик гана ужам манын ӱшанем. Палемдыме пырыс воктек шинчын кофем подылмо, Онегин ден Пушкин шарнымаш деке минен толмо, олан архитектурыжым ужмо моткоч шуэш.

О.МОШКИНА

Опубликовать в Одноклассники

Добавить комментарий