Ик пенсий фонд гыч весыш куснаш шонышо граждан-влак тидын нерген йодмашым тений 1 декабрь марте пуэн шуктышаш улыт.
Погымо пенсий оксам (пенсий накоплений) инвестироватлыше страховщикым талук еда вашталташ лиеш, но тичмаш парыш фондышто вич ий улмо годым веле палемдалтеш.
Ик фонд гыч весыш жап деч ончыч куснымо нерген йодмашым пуымо годым страховщик парышым йомдараш лийме нерген эреак шижтара.
31 декабрь марте «йӱкшыктарыме пагыт» манме вийыште лиеш, тиде жапыште йодмашым пуымо деч вара шонымашым вашталташ да ончычсо фондыштак кодаш йӧн пуалтеш. «Йӱкшыктарыме пагытым» закон дене пеҥгыдемдыме.
Ик пенсий фонд гыч весыш вончымо нерген йодмашым Россий Пенсий фондын верысе органжын клиент службыштыжо але Кугыжаныш да муниципальный услуго единый портал гоч вияҥдыме квалифицироватлыме электрон подпись дене пеҥгыдемдыме электрон документ формо дене пуаш лиеш.
Пуымо йодмаш да лукмо пунчал нерген уверым Россий Пенсий фондын сайтыштыже але Кугыжаныш услуго порталыште гражданинын личный кабинетше полшымо дене рашемдаш лиеш.
Личный кабинет гочак, индивидуальный лицевой счёт гыч выпискым заказатлен, погымо пенсий оксан кугытшо да тудым могай фондыш вераҥдыме нерген уверым налаш йӧн уло.
Марий Элыште 385,5 тӱжем еҥын погымо пенсий оксаже уло.
М.ИВАНОВА
