Марий Элыште тений 9 тылзе жапыште регионысо ава капитал дене 141 еш пайдаланен. Тудын чумыр роскотшо 8,4 млн. теҥгеш шуын.
Регионысо ава капитал – тиде «Демографий» национальный проектын направленийже-влак кокла гыч иктыже. Тудым 2012 ий гыч нылымше да тылеч моло йочам ыштыше але ашнаш налше еш-влак налаш праван улыт. 2019 ийыште тиде суммо 58379 теҥге лийын, 2020 ийыште ава капиталын кугытшым 60131 теҥге марте индексироватлыме.
Выплатым ача-ава кокла гыч иктыже налын кертыт.
Регионысо ава капиталын выплатшым налашлан икмыняр условий дене келшен толаш кӱлеш:
• йодмашым пуышо ача але ава ден нунын йочашт Российын гражданинже лийшаш улыт;
• тылеч посна нуно чыланат пытартыш кум ий жапыште Марий Элыште илыме кумдыкыштышт официально регистрироватлыме лийшаш улыт;
• нылымше але тудын деч вара шочшо, ашнаш налме йочан шочмо кечыж деч вара ик ий эртышаш;
• йодмашым пуышо гражданин але тудын пелашыже тымарте ава капиталлан правам кучылтын огытыл.
Ава капиталын выплатшым йодмашым пуышо гражданинлан ик гана пуат. Иканаште кок але тылеч шуко йочам ыштыме але ашнаш налме годым тудын ик кугытшо веле палемдалтеш.
М.ИВАНОВА
