12 июньышто Йошкар-Олаште куштылго атлетике дене рӱдолан чемпионатше ден первенствыже эртеныт. Тушко Марий Эл ден Татарстан республикла, Киров область гыч 200 утла спортсмен ушнен.
Куштылго атлетике дене всероссийский федерацийжын марий региональный пӧлкажын данныйже почеш, ныл спортсмен республикын да шкештын кӱкшытыштым уэмденыт. Кирилл Семенов 1000 метр дистанцийым кок минутат 30,5 секундышто куржын (20 ияш юниор коклаште). Никита Чирков 300 метрым 36,5 секундышто эртен (18 ияш марте коклаште). Оксана Васильева 60 метрым 7,6 секундышто куржын (20 ияш марте). Андрей Ярандайкин 60 метрым 6,9 секундышто эртен (18 ияш марте коклаште). Нине спортсмен-шамыч чыланат сенышыш лектыныт.
Тыгак эртыше таҥасымаште спорт мастерыш кандидат нормым ныл еҥ шуктен. 19 ӱдыр-рвезе 1-ше разрядым налын. 24 июньышто куштылго атлетике дене Марий Элын кубокшо да ветеран-влакын первенствышт лийыт.
Снимкыште: Куштылго атлетике дене Йошкар-Олан чемпионатше ден первенствышкыже 200 утла атлет чумырген.
Л.ШАБДАРОВА.
