Эртыше кечылаште Волжский районысо Памар селан тӱҥ уремыштыже республикнан 100 ияш юбилейжылан пӧлеклалтше «Мый Марий Элым йӧратем» лӱман мотор баннерым сакеныт.
Тудым ваштар лышташ, сылне пӱртӱс, Памар ял шотан илем гочат лыкын-лукын йоген эртыше Элнет, МАССР-ын калык поэтше, МАССР Кугыжаныш премийын лауреатше С.Вишневскийын «Шочмо вер» почеламутшо дене сӧрастареныт.
— Памар администрацийыш шым илем пура. Марий Эллан 100 ий теммылан пӧлеклалтше баннерыште кажне илемын эн мотор вержым ончыктымо, — палемда Памар ял шотан илем администрацийым вуйлатыше А.Калабашкин. – Кундемна кумдан палыме да чапланыше еҥже, тӱвыра да сымыктыш деятельже-влак дене кугешна. Нунын кокла гыч землякна, Памар селаште шочшо Семён Вишневский Марий республикыште илыше кажне еҥлан палыме. Лач тудо кундемланна чапле почеламутым пӧлеклен:
«Марий Элем, кугу тӱнян картлаште
От нал ваштар лышташ гай верымат…»
Д.СМИРНОВ
М.ИВАНОВА
