Кугу Отечественный сарыште сеҥымылан тений 75 ий теммым шотыш налын, шучко кредалмашлаште вуйыштым пыштыше да тылыште тыршыше-влак лӱмеш республикысе тӱрлӧ кундемлаште улшо памятник ден турлӧ шарныктыш-влакым тӧрлатат але уымак ыштат.
Теве У Торъял район Кӱанпамаш ялыштат Кугу Отечественный сарыште колышо да локальный сар-влакын участникышт лӱмеш ыштыме мемориал комплекс жап эртыме семын чотак тоштемын ыле. Сандене тудым уэмден тӧрлатеныт да 15 октябрьыште мемориал комплексым торжественно почыныт.
Ынде тудо тевыс могай сӧрал да шинчашке перныше! (снимкыште). Ончыл радамыште пурлаште – Совет Ушем Герой Георгий Фёдорович Бастраковлан плита. Тудо 1917 ий 18 апрельыште Пектансола ялыште шочын да 1944 ий 27 январьыште сарыште геройлын колен.
Уэмдыме мемориал комплексым почмашке «У Торъял муниципал район» муниципал образований вуйлатыше Е.Небогатиков, У Торъял район администраций вуйлатышын алмаштышыже Д.Волков, районысо ял шотан илем вуйлатыше, Кӱанпамаш школын туныктышыжо ден тунемшыже-влак, ял калык да моло чумыргеныт. Нунын кокла гыч иктышт, вуйым савен, шарныктыш деке гирляндым, весышт пеледышым пыштеныт. А У Торъял районысо централизоватлыме клуб системын пашаеҥже-влак тиде шкешотан пайремым изирак концерт дене сылнештареныт.
Л.КАМАЛЕТДИНОВА
