СЫМЫКТЫШ

90 ий эртен

Йылмым, сылнымутым да историйым шымлыше В.М.Васильев лӱмеш марий шанче институт 90 ияш лӱмгечыжым палемден. Тидын лӱмеш тушто «Марий Элыште гумманитарный шанче-влак: паша лектыш да ончыклык» регион-влак кокласе кӱкшытан шанче-практик конференций эртен.

Тӱҥалмыж деч ончыч МарНИИЯЛИ-н вӱдышӧ учёныйжо-влаклан галерейым официально почыныт. Тушко марий наукын вияҥмашкыже кугу надырым пыштыше 33 еҥын фотосӱретшым вераҥдыме. Каласен кодыман, ты шанче организацийым почмо нерген лачшымак 100 ий ончыч 1 октябрьыште увертарыме улмаш. Ты пагытыште марий ученый-влакын сеҥымашыштат ятыр лийын, тачысе илышыште нунын авторитетыштат, кӱлешлыкыштат пеҥгыдемдалтын.

Институтын коллектившым республикысе тӱвыра, савыктыш да калык паша шотышто министр Константин Иванов саламлен. Тудо шанчызе-влакын социологий шымлымашыштын кӱлешлекыштым палемден да творческий да научный сеҥымашым тыланен. Тыгак тудо институт директор Евгений Кузьминлан Марий Элын 100 ияш лӱмгечыжлан палемдыме мер да политик пашан, Марий облисполкомын икымше председательже И.П.Петров лӱмеш «Калык верч тыршымаш» шарнымаш медальым кучыктен.

Конференцийыште гуманитарный науко сферыште шанчызе-влакын пашаштым иктешленыт, регионышто шымлымаш пашам виянден колтымо опыт дене палдареныт. Формуыш Москва, Санкт-Петербург, Сыктывкар, Саранск, Ижевск, Озаҥ, Чебоксар гыч ученый-влак толыныт.

С.НОСОВА

Опубликовать в Одноклассники

Добавить комментарий