КУЛЬТУР ДА ИСКУССТВО ЭСТРАДЕ

«Симд» студий тӱрлӧ калыкым уша

В.И.Ленин лӱмеш Тӱвыра полатыште чылаже 50 тӱрлӧ студий да коллектив уло. Шукынжо кушташ йӧратыше йоча да кугыеҥ-влакым уша. Нунын коклаште – кавказ калыкын «Симд» куштымаш студийже.
Осетин йылме гыч марлаш кусараш гын «симд» шомак «оҥго» манмым ончыкта. Тыгай лӱман куштымаш – оетин калыкын ик эн тошто да йӧратыме куштымашыже. Ансамбльжым 2013 ийыште Тӱвыра полатын кызытсе вуйлатышыже Хаджимурат Гуцунаевын кумылжо почеш чумырымо. Лач тудо участник-влаклан сценыш лекташ вургемым, йолчиемым налаш полша. Владикавказ ола гыч лач тыгаяк лӱман ансамбль Марий Элышкына ик гана веле огыл толын коштын да концертше дене куандарен. Тудын икымше вуйлатышыже Виктория Воронцова лийын .
«Симд» студийын тӱҥ шонымашыже – Осетий да Кавказ кундемысе моло республик-влакын йӱлаштым, тӱвыраштым пален налаш, весылан палдараш да арален толаш. Мо оҥайже, студийыш тӱрлӧ национальностян йоча-влак коштыт. Тыге тиде «куштымаш оҥго» армян ӱдыр Мариа Григоряным да йыгыр эрге Марк ден Мгерым Маркарьянмытым, руш рвезе Тимур Глушковым, Татарстан гыч Расул Абдрашитовым, чуваш ӱдыр Ксения Чепаковам, грузин калык гыч Софья, Эка да Илья Цквитинидзым, марий калык кокла гыч Ян Михеевым, осетин калык гыч Ева Бибиловам ден Даниела Гуцунаевам иктеш ушен. Нуно пырля кушташ тунемыт, жапыштым пайдалын эртарат, тыге, икте-весым умылен, вес калыкын йӱлаштым пален налыт да келшен илат.
Самырык коллектив Российыште да йот эллаште ятыр конкурсышто да фестивальыште сеҥыше радамыш лектын. Кызыт ансамбльым Армен Гаспарян вуйлата. Тудыжо ты студийыш икымше кечылаж гычак коштеш, тунамже тудлан латкок ий лийын, сандене тыштак кушкын манын каласаш лиеш. Кызыт самырык еҥ куштымо мастарлыкшым умбакыже вияҥда да ынде шкежат йоча-шамычым тидлан туныкта.
Студийыш коштшо ӱдыр-рвезе-влакым ончен шонымаш шочеш: тӱрлӧ калык-влак коклаште келшымаш шочеш, лач тыгай келшымаш кажныжын йӱлажым, йылмыжым арален кодаш полша.

М.СКОБЕЛЕВ

Опубликовать в Одноклассники

Добавить комментарий