2-4 октябрьыште «Ералаш» республикысе студент отрядын командирже Анастасия Князева ден комиссарже Елена Глушкова Сочиш миен толыныт. Амалже – студент педагог отряд-влакын «Сириус» VII Россий форумышт лийын.
Краснодар кундемыште эртыше мероприятийышке Российын тӱрлӧ лукшо гыч кумшӱдӧ наре участник чумырген. Нуно чылан шке кундемысе педагогике отрядыштын еҥже улыт. Лагерьлаште пашам ыштат.
— Форум «Сириус» туныктымо кумдыкын ик лукыштыжо, науко да искусство паркыште, эртен. Тушто мыланна вожатый сомыл дене кылдалтше мастер-класс-влакым ямдыленыт. «Дистанционный тунеммаште лагерьым кузе почаш?», «Пашаш налышт манын, вуйлатыше дене кузе мутланаш?», «Кӱлеш мо мылам ты профессий?» да эше шуко теме почеш каҥашымаш-влакым эртареныт.
Кумдан палыме еҥ-влакат мероприятийыш ушненыт. Нунын коклаште —Россий студент отряд-влакын рӱдӧ штабшын командирже Михаил Киселёв, самырык мурызо Стас Море.
Форум пеш пайдале ыле. Ты кечылаште шуко уым пален налынна. Вес студент отряд вуйлатыше-влакым вашлийынна. Нунын ой-каҥашыштым шотыш налын, ончыкылан планым ыштенна. Адакшым теҥызым ужын толынна.
Марий кугыжаныш университетысе студент паша отряд штаб командир Надежда Головиналан, студент паша отряд-влакын регионысо штаблан таум ойлымо шуэш. Нуно мыланна «Сириусыш» логалаш полшеныт», — каласкалыш мероприятий нерген «Ералаш» отрядын командирже Анастасия Князева.
Самырык-влак полатыште вожатый-влакын полышкалышыштым ямдымылан Марий Эл Образований да науко министерстве ӱдырым таумут дене палемден. Тудын вуйлатымыж почеш «Ералаш» отряд республикысе да Российысе лагерьлаште 120 сменым эртарен. Тыгак Анастасия «Идалыкын лидерже» республик конкурсын сеҥышыже, «Юл кудемы федерал округын эн сай старостыжо», «21-ше курымын туныктышыжо» конкурслан участникше.
О.МОШКИНА
