ЭКОНОМИКЕ

Пашам ончычсо семынак ыштена, но…

16 октябрьыште Марий Элын промышленность, экономический вияҥмаш да торговльо министрже Станислав Крылов (снимкыште) регионым вуйлатыше Александр Евстифеевын «Республикыштына у коронавирус инфекций (COVID-19) шарлымылан кӧра калыклан сай санитарно-эпидемиологический илышым ыштыме мере-влак нерген» указыш пуртымо черетан вашталтышыж-шамыч шотышто СМИ пашаеҥ-влаклан комментарийым пуэн. Документын у редакцийже чыла тӱрлӧ организацийын пашаж дене кылдалтын да эпидемий ситуацийлан кӧра санитарный йодмашым пеҥгыдын шуктымашке виктаралтын.
Ушештарена: 16 октябрьыште утларак ямде улмо режимым 15 ноябрь марте шуйымо.
— Указ дене келшышын, чыла организаций ончыкыжымат тачысе кече мартесе паша режимже денак пашам ышта, — палемден Станислав Игорьевич. – 15 ноябрь марте шуйымо утларак ямде улмо режим промышленный предприятийла денат, торговльо денат, обслуживаний сфер денат кылдалтын. Общественный питаний организаций, фитнес-рӱдер, сатулымо да промышленный предприятий-влак умбакыжат ончычсо режим денак пашам ыштат. Обслуживатлыме чыла сфер кузе пашам ыштен, умбакыжат тугак ышта».
Министр указын у редакцийыштыже COVID-19 инфекцийлан шарлаш чаракым ыштыме шотышто ешартыш мере-влакым палемден.
— Пашам пуышо-влаклан шке предприятийыштышт да организацийыштышт эпидемический обстановкылан тӱткышым ойыраш, 30 але утларакат процент пашаеҥым, поснак 65 ий деч кугурак да неле чер дене орланышым, тора гыч пашам ыштыме режимыш кусараш темлыме, — палемден С.Крылов. – Пашам пуышо-влаклан тыгак пашаеҥыштым йот эллашке командировко дене колтымым чарнаш темлыме, а граждан-влаклан – отпуск пагытыште йот эллашке каяш. Пашаеҥ-шамычын эпидемиологический йодмаш-влакым шуктымышт шотышто мутым вуйлатыше-влак кучат. Тидымак шотыш налын, чыла вуйлатышылан эпидемий ваштареш виктаралтше мере-влакым кӱлынак шукташ темлыме.
Республикыштына тӱшка транспортлаште, поликлиникылаште, кевытлаште, аптекылаште да шуко еҥ улман моло верлаште маске дене коштман, ушештарен министр. Вес чарак тӱшка мероприятий дене кылдалтын.
— «Граждан-влакым иквереш чумырышо публичныйлан шотлалтше спорт, физкультур, ончыктымо, кандарыме, веселаҥдыме, сотемдарыме, ончер, рекламе да моло шотан тӱшка мероприятийлам эртараш огеш лий», — документ гыч ужашым лудын рашемден министр.

М.ИВАНОВА

Опубликовать в Одноклассники

Добавить комментарий