«Коронавирус: статистика» сайтын 16 октябрь эрдене увертарымыж почеш, Марий Элыште пытартыш суткаште COVID-19 дене эше 45 еҥ инфицироватлалтын. Пандемий пагытыште у коронавирус инфекций дене черланыме 5366 случайым регистрироватлыме, ты чот гыч 4542 еҥ паремын, 59 пациент колен.
Марий Элын Тазалыкым аралыме министерствыжын 16 октябрь эрдене увертарымыж почеш, пытартыш суткаште республикын инфекционный стационарлаж гыч паремше 30 пациентым мӧҥгӧ колтымо, тыгодымак 119 черлым эмлалташ пыштыме. Кызыт регионнан 9 инфекционный стационарыштыже медик-шамыч 852 черлым у коронавирус инфекций деч эмлат. Тиде у антирекорд!
Республикыштына коронавирусан пациент-влаклан медицине полышым пуымо 987 койко уло. Чаманен палемдыман, тиде чот кечын иземеш. Медик-влаклан шуко паша логалеш. Сандене граждан-шамычлан COVID-19 дене черланыме деч чыла мерым, чыла темлымашым шукташак кӱлеш.
М.ИВАНОВА
