СОЦИАЛ ИЛЫШ

Интернатыште лийын, Звениговыш миен

Марий кундемыштына социально-кӱлешан объект-влакым чоҥымо да олмыктымо паша икшырымын кая.
«Демографий» национальный проектым илышыш пуртымо кышкарыште Морко районысо Залесный посёлкышто верланыше Красностекловарский психоневрологический интернат пелен чоҥымо у корпус вашке шке омсажым почеш. Кызытсе да мӧҥгысӧ гай илышлан келыштарыме кок пачашан зданийыште 100 койко-верым шындаш 20 пӧлемым ыштыме, приём-карантин отделенийым, кочмыверым, медицине пашаеҥын пӧлемжым, библиотекым, озанлык да санитарно-бытовой помещенийым, процедур кабинетым оборудоватлыме, христиан ден мусульман-шамычлан кумалме пӧлемым ойырымо, начарын коштшо але коштын кертдыме-влаклан кок лифтым шындыме. Объектым капитально чоҥаш 80 млн. теҥге наре кугыт инвестицийым кучылтмо.
13 октябрьыште Марий Элым вуйлатыше Александр Евстифеев тиде тӧнежыш ыштыме пашам аклаш миен. Красностекловарский психоневрологический интернатын директоржо Фания Шакирова тудлан помещений-шамычым ончыктен, чоҥымо-олмыктымо пашам сайын шуктымо деч посна эше пациент-шамычлан утларак келшен толшо мебель ден малыме арверым налмым палемден.
«Кийыше черле-влаклан кровать ден ортопедический матрасым налме. Тыште илыше-влакланат, пашам ыштыше-шамычланат условий келшыше. Шонымашнам шукташ полшымыланда тау Тыланда», — манын Ф.Шакирова.
Интернатыште илыше-влакым тошто гыч у корпусыш лишыл жапыште кусарат, а ончычсо зданийыште тӱрлӧ кружокым эртараш тӱҥалыт.
«Корпусышто пӧлем-влакым сайын оборудоватлыме, тыгай категорий граждан-шамычлан кӱлшӧ медицине ден социальный обслуживанийлам шотыш налме. Яра жапым пайдалын эртараш чыла йӧн уло. Нигушкат коштмо огеш кӱл. Чылажымат кӱлын ыштыме. Тиде кызыт республикыштына ик эн сай корпус, тудым негызлан да образецлан налман. Ямде проект уло. Конешне, теҥгече мом проектироватлыме огыл гын, тудым мучаш марте шуктыман, кажне пӧлемыште санузел улман проектым налаш кӱлеш. Но тымарте мо ыле, да ынде мо лийын – уло мом таҥастараш!?» — палемден республикым вуйлатыше.
А.Евстифеев тиде кечынак Звенигово олаште верланыше социально кӱлешан эше ик объектыш миен. РФ Рӱдӧ банкын Юл-Виче тӱҥ виктемжын Марий Элысе Национальный банкшын пӧлкаже 2000 утла кв.м кумдыкан кок пачашан административный зданийжым яра пайдаланаш пуэн. Калыкым социально обслуживатлыме комплексный да Калыклан социальный полыш мере-влакым пуымо рӱдер-влак тышке телымак куснен кертышт манын, оралтым кыртменак олмыкташ тӱҥалыныт.
Кызыт палемдыме тӧнеж-шамыч муниципальный йочасадын 1-ше да 2-шо пачашлаштыже верланат. Тыште пашам ышташат, социальный услугым налше-влакын персональный данныйышт ден документацийым аралашат вер моткоч шагал.
Марий Элын социальный вияҥмаш министрже Марина Островскаян мутшо почеш, тыште зданийын кӧргыжым, леведышыжым, урем вел пырдыжшым олмыкташ, кумдыкым тӱзаташ кӱлеш. Пурымаште начарын коштшо але коштын кертдыме граждан-влаклан подъёмникым шындыман, Оралтым капитально олмыкташлан проект-смете документацийым ыштыме, подрядчик фасадым ачалаш тӱҥалын.
«Туврашым вашталтена, волгыдым ешарена. Рӱдерлаште электрон черетым ыштена. Йоча-шамычлан йоча пӧлем-технопаркым оборудоватлена, лабиринт ден скалодромым шындена. Икшыве-влак тыштат усталыкыштым вияҥдаш тӱҥалыт», — палемден М.Островская.
Марий Элым вуйлатыше чыла пашам жапыштыже пытараш кӱлмым палемден, молан манаш гын тиде цельлан оксам республикын тенийысе бюджетше гыч ойырымо, сандене тудым идалык мучаш марте кучылтын шуктыман.

Марий Элым вуйлатышын организаций да

аналитике виктемжын уверже негызеш

М.ИВАНОВА ямдылен

Опубликовать в Одноклассники

Добавить комментарий