Медведево районысо Пурсанур ял шотан илем администрацийын кумдыкыштыжо верланыше Юшкино шӱгарла Йошкар-Ола гыч Шернур велыш кудалме кугорно деч шола велым кодеш. Тудым почмылан тений 50 ий темын. Йошкар-Ола деч тораште огыл верланымыжлан, идалыкын чыла пагытыштыже пураш лиймылан кӧра тышке шке жапыштыже ош тӱня дене чеверласыше шуко еҥын капшым тоеныт, сандене шӱгарла 9 гектар утла кумдыкыш шарлен. Кызыт тудын дене тӱҥ шотышто Пурсанур кундемыште илыше калык гына пайдалана.
Шӱгарла муниципальныйлан шотлалтеш, сандене Пурсанур ял шотан илем администраций тудым кажне ийын икмыняр гана эрыкта да тӱзата.
— Тиде пашам чӱчкыдынжӧ верысе администрацийын да тӱвыра пӧртын еҥже-влак шуктена. Шӱгарлам эрыкташ шкежат кажне ийын ик гана веле огыл уло кумылын лектам. Тиде пашам лавыранлан, айдемым лапкаҥдышылан ом шотло, мӧҥгешла, кугезына-влакын эрелан верланыме мландыштым эрыкташ – мемнан порысна, шонем, — манеш Пурсанур ял шотан илем администрацийым вуйлатыше М.Прокудина (снимкыште). — Южгунам спонсор-влак оксам лачшымак шӱгарлам эрыкташ колтат. Тунамже манипуляторым ӱжыктена да чыла шӱк-куштырам полигоныш оптен колтена. Таче теве шӱгарлаште торлан шотлалтше шарныктышым, плиткым, ыресым, пушеҥгым мойн чарашке луктына, эрла полигоныш оптен колтена, а кошкышо кушкыл гай куштыражым йӱлалтена.
Администраций верысе тӱҥалтышлан полшымо кугыжаныш программылаштат чолган участвоватла. Тушко ушнымыж дене 2017 ийыште шӱгарлам кӱртньӧ савар дене авырен налыныт. Тылеч посна тӱҥ корнылам пеҥгыдемденыт.
— Шкат паледа, кызыт республик мучко гаяк орен кушшо Сосновскийын полдыранже кундемыштына «Семёновский племзавод» ЗАО деч шарлаш тӱҥалын. А Юшково шӱгарла тудын деч тораште огыл верланен, да аяран кушкыл йырже чодырала нӧлталт шогалын. Айдемылан лӱдыкшӧ улмыжым шотыш налын, кугорно ден шӱгарла коклаште кушшо полдыраным, Марий Эл правительствын «Об утверждении Порядка предоставления иных межбюджетных трансфертов из республиканского бюджета Республики Марий Эл бюджетам муниципальных образований в Республике Марий Эл на выполнение работ по предотвращению распространения сорного растения борщевика Сосновского в 2020 году» пунчалже дене келшышын, ынде кокымшо ий пытарена. Тений регионын Ялозанлык да продовольствий министерствыже тиде пашалан 128 тӱжем теҥгем ойырен, — аяран кушкыл деч лакемалт кодшо чара верым ончыктыш Марина Владимировна. – Тылеч посна эше кажне шошым шӱгарла кумдыкышто коля пошымо деч дератизацийым, пудий шарлыме деч дезинсекцийым шке кӱшеш эртарена. Икманаш, кугезына-влакым тойымо верым лийме семын чаткан кучаш тыршена, тыгодым чыла санитарный нормым шотыш налына.
Шӱгарлам эрыктыме да тӱзатыме пашам мыят илыше айдемын порысшылан шотлем. Вет меат, илен-толын, тушанак верланена. Чонна дене кажныже ару верыште кийынена.
Маргарита ИВАНОВА
Авторын фотожо
