Марий Элыште у коронавирус инфекций дене черланыше пациент-влаклан медицине полышым пуышо кандаш организацийышке кече еда 70 утла еҥым эмлалташ пыштат. Врач-шамыч чыла гаяк пациентлан «пневмоний» диагнозым шындат. Тиде чер COVID-19 инфекцийын организмлан нелылыкым ыштымыж дене кылдалтын, а коронавирус – калыкын эпидемий ваштареш виктаралтше мере-влакым шуктыдымыж дене.
У коронавирус инфекцийын шарлымыж деч калыклан пандемий тӱҥалме пагыт гычак шуко еҥ улман верлаште маске ден перчаткым чияш, социальный дистанцийым кучаш, антисептик дене пайдаланаш темлыме. Ситуаций кечын нелемеш гынат, шагал огыл граждан ден организаций эпидемий ваштареш виктаралтше мере-влакым шотыш огыт нал але, манмыла, пылде-полдо шуктат. Тыге огеш лий! Сандене Йошкар-Ола прокуратурын, Роспотребнадзорын Марий Элысе виктемжын, Россий МВД-н Йошкар-Оласе виктемжын да Йошкар-Ола администрацийын пашаеҥже-влак кече еда рейдлашке лекташ тӱҥалыныт. Нуно кевытлаште, аптекылаште мойн санитайзер ден социальный дистанцийым кучаш темлыме пале-влакын улмыштым, тӱшка транспортым дезинфицироватлыме радамым республикнан рӱдолаштыже веле огыл, районлаштат тергат. Эпидемий ваштареш виктаралтше мере-влакын шукталтмыштым моторлык салонлаштат ончат.
— Нарушенийым рашемдымек, ситыдымашым кораҥдаш предписанийым пуэна але административный материалым возена, — палемдышт Йошкар-Ола мэрийын пресс-службыштыжо.
У коронавирус инфекцийын эпидемийже ваштареш виктаралтше мере-влакым пудыртымо нерген чыла еҥ 45-06-22 номеран телефон дене йыҥгыртен увертарен кертеш. Мут толмашеш, кевытлаште, сатулымо рӱдерлаште, услугым пуымо моло организацийыште маске режимым пудыртымо нерген вуйшиймаш кече еда 50 наре пура.
М.ИВАНОВА
