Ты секцийым филологий шанче доктор Любовь Абукаева вӱден. Тушто 9 делегат дене пырля марий онаеҥ, шанчызе, тӱвыра специалист, журналист-влак лийыныт. Чылаже 21 докладым колышытыныт. Тӱҥ докладым республикысе Марий юмыйӱла ушемын тӱҥ онаеҥже Александр Таныгин ыштен. Тудо пытартыш ныл ий жапыште юмыйӱла дене кылдалтше пашам иктешлен. Ушемым вуйлатыше Александр Бирюков (тудым шукерте огыл веле сайлыме) ончыкыжым ыштышаш паша радам дене палдарен.
Марий ото-влак таче республикыште кугыжаныш полшымо дене аралалтыт. 327 отым ты реестрыш пуртымо. Кызыт верласе общине вуйлатыше-влак нуным регистроватлыме пашалан пижыныт. А тыште кугу полышым республикысе Тӱвыра, савыктыш да калык паша шотышто министерствын Тӱвыра поянлык объект-влакым аралыме, пайдаланыме да оролымо шотышто пӧлкаже пуа. Тудын вуйлатышыже Аурика Михеева регистраций пашам кузе куштылгынрак ворандарен колташ лийме дене палдарен. Тидыже республикысе онаеҥ-влаклан веле огыл, вес кундем гыч толшо-шамычланат пайдале лийын. Молан манаш гын туштат у кумалме вер-влакым почмо, кумалтышым эртарыме нерген увер эре гаяк шокта. Тусо онаеҥ-шамыч шкештак ото-влакым регистрироватлыме шотышто полышым йодыныт.
Марий Элыште таче марий кӱсото-влакым шымлыме пашат сайын кая манаш лиеш. Ты шотышто Т.Евсеев лӱмеш калыкле тоштерын специалистше-влак чот тыршат. А кузе тидым ыштат – тоштерын пашаеҥже Диана Михеева палдарен. Мо ӧрыктарыш – регионла гыч толшо-шамычат тоштерын пашаеҥже-влакым тыгак шкешт деке отыштым шымлаш ӱжыныт.
Юмыйӱлам аралыме, шуйымо пашашт дене Пошкырт, Одо, Татарстан, Урал кундемла, Моско, Санкт-Петербург олала гыч толшо-шамычат палдареныт.
Любовь Абукаеван ойлымыж почеш, чыла темлымаш ныл лаштыкышкат погынен, нуным тыгак резолюцийыш пурташ темленыт. Но икмыняр тӱҥ шонымашыжым ончыктенак кодыман, очыни. Марий юмыйӱла деке самырык-влакым лишемдаш, нуным шӱмаҥдаш кулеш. Марий школлаште тидын нерген тыгак умылтарымаш пашам эртарыман. Ото-влакым, йӱлам аралыме, шымлыме пашам вияҥдаш. Кугурак кумалтыш-влакым эртарыме деч ончыч уверым кумданрак шарыме паша эртаралтшаш. Онаеҥ-влаклан жапын-жапын семинарым эртарыман…
Каласен кодыман весымат, вес кундем гыч толшо онаеҥ-влак докладчик, эксперт-влаклан шуко йодышым пуэныт. Тидыже ты секцийыште тарватыме йодыш-влакын кӱлешлыкшым ончыктен.
С.НОСОВА
