КУЛЬТУР ДА ИСКУССТВО

Эшпайым шарнена, тугеже тудо – пеленнак

Марий калыкнан лӱмлӧ эргыже, СССР-ын калык артистше, композитор Андрей Эшпайлан памятник И.С.Палантай лӱмеш культур да искусство колледжын академический музык факультетшын оралте ончылныжо вашке лиеш.

1 октябрьыште, Музыкын кечынже, памятникым вераҥдыме кумдыкыш кӱм пыштеныт.

Тӱнямбал кӱкшытан «Йывырте-Радуйся!» фестиваль жапыште чапланыше марий композитор Андрей Яковлевич Эшпайын памятникше лийшаш кумдыкыш кӱм пыштымым сайлан шотлыман. Эшпайын лӱмжӧ дене республикыштына моткоч шуко кылдалтын. Кызыт Данийыште илыше Мария уныкаж дене пеҥгыде кылым кучена, — палемдыш колледж вуйлатыше Алексей Паскичев. — Андрей Яковлевич Марий Элыш кеч-кунамат уло кумылын толын, вет марий мландыште тудо шочын, вийым поген.

Мероприятийыште Марий Эл правительстве председательын икымше алмаштышыже Михаил Васютин, тӱвыра, савыктыш да калык паша шотышто министр Константин Иванов, Озаҥысе Н.Г.Жиганов лӱмеш кугыжаныш консерваторийын профессоржо Александр Маклыгин да молат лийыныт.

Михаил Зиновьевич культур да искусство колледж ончыко погынышо-влакым Музык кече дене саламлыш да тыгерак мане:

Кумдан палыме марий семмастар Андрей Эшпайын уке лиймыжлан вашке вич ий лиеш. Кажне гана тудын дене вашлиймашым порын шарналтем. Кодшо кечылаште эсогыл тудын дене мутланымым архивыштем шергалын лектым. Андрей Яковлевичым да марий искусствым вияҥдымашке надырым пыштымыжым ме эреак шарнаш тӱҥалына. Республикын культур министерствыжын, марий общественностьын тыршымыштлан кӧра колледж ончылно, тудын лӱмжым нумалше зал воктене, шарныктышым шогалтена. Жапше годым Андрей Эшпай лӱмеш Российысе самырык композитор-влаклан конкурсым эртараш тӱҥалынна ыле. Икымше ийын Андрей Яковлевич шкежат толын, жюриште лийын, но чаманаш кодеш, кокымшо вашлиймашлан ямдылалтме годым мемнан дене ӱмырешлан чеверласыш. Но тудын гаяк чолга да уста еҥ-влакын тыршымыштлан кӧра Эшпайын лӱмжӧ ила да илаш тӱҥалеш.

– Яков Эшпайын шочмыжлан 130 ий темме идалыкыште эргыже, Андрей Эшпайын, памятникше шогышаш верыш кӱм пыштыме — моткоч кугу событий. Андрей Яковлевич пеш сылне, чонеш логалше музыкым возен. Мутат уке, марий калыкын илышыж дене кылдалтше произведенийже-влак кажне марий енлан лишыл да шерге. Мутлан, Кумшо симфонийжым налаш… Тудо ятыр ий Москошто илен гынат, чонжо дене Марий мландыште лийын, вет кажне произведенийыштыже шочмо калыкшын илыш-йӱлаже, тӱвыраже палдырна. Эшпайлан кӧра Марий кундем нерген Европышто пален налыныт. Садлан ончыкыжымат тудын музыкшо тӱнямбалне да марий музыкальный культурышто ик эн виянлан шотлалтеш, — чонжым почын каласыш Александр Львович.      

Чынжымак, А.Эшпай Марий Элыш толмыж годым эреак кумыл нӧлтшӧ лийын. «Тышке мӧҥгем семынак вашкем», — манын тудо. Эртаралтше конкурсышто, фестивальыште жюрим вуйлатен да кажне тунемшын шоктымыжым тӱҥалтыш гыч мучаш марте колыштын, кӱлеш годым ой-каҥашым пуэн да искусство тӱняште вияҥаш волгыдо корным ончыктен.             

Мероприятий жапыште колледжын тунемшыже-влак А.Эшпайын «Ангара» балетше гыч «Валентина» произведенийжым шоктеныт.

Тиддеч вара Э.Сапаев лӱмеш опер да балет театрыште «Йывырте-Радуйся!» искусство фестиваль-лабораторий почылтын. Тудо Андрей Эшпайын шочмыжлан 95 ий теммылан пӧлеклалтын.

Фестиваль-лабораторий жапыште сем тӱняште кушшо-влаклан тӱрлӧ вашлиймаш, мастер-класс эртаралтыныт.

 

А.БАЙКОВА

М.Скобелевын фотожо

Опубликовать в Одноклассники

Добавить комментарий