Мут – делегатлан
Ю.ИГНАТЬЕВ, Морко район «Передовик» ялозанлык артельын председательже:
Памаш-шамыч эҥерыш йоген пурат, манына, а чынжым гын нуно эҥерым ыштат. Тиде эҥер кугемеш, кугемеш да Юл эҥерыш савырна. Уло Российлан Юл эҥер гаяк кугу калык – руш калык. А уло Российыште 200 калык — шагалрак еҥан калык. Нуно вет памаш улыт, кугу Юлым пойдарат. Нине изи памашлам арален кодаш огыл гын, огыт лий гын, лиеш мо тиде кугу Юл вӱдшӧ? Кошка да пыта. Йодышыжо лач тыште. Кугужо изим арален кодышаш, изиже кугум арален кодышаш. Тыге лийшаш.
А чынжым гын, шагал еҥан калык-влакым керек-кузе арален кодаш тӧчена гынат, глобализаций манме деч утлен кертына мо? Калыкна-влак тугак рушаҥаш тӱҥалыт. Кузе памаш гыч вӱд йоген пура эҥерыш да эҥер дене варналтеш, тугак. А памашыже вара йогымым ок чарне мо? Вот кушто йодышыжо. Памашыжым эрыктен шогышаш вет кугу эҥер гына огыл – воктечше вӱдым наҥгаен. Тиде эше шкенанат паша.
Ю.ИСАКОВ
