МАРИЙ ТӰНЯ

Суапше мондалтшаш огыл

Тений шошым Киров областьысе чолга марий еҥ-влак Владимир Васильевич Унженинын да «Марий ушем» мер организацийын тыршымыштлан кӧра Киров область Пыжанбю посёлкысо краеведений тоштерыште марий мер толкынышто, туныктымо да шанче пашаште тыршыше С.Ф.Токмалаев лӱмеш посна лук почылтын. Чаманен каласыман, 1900-1956 ийлаште илыше ты чолга марий еҥ нерген йӧршеш гаяк огына пале. Ондакшат, пытартыш пел курым жапыштат С.Ф.Токмалаев нерген печатьыштыжат пеш шагал возымо. Эсогыл марий коклаште тудым мондалтше лӱмланат шотлаш лиеш. Сандене латикымше Марий калык погын вашеш тудым порын шарналташ жап шкежак йодеш.

Савва Фёдорович Токмалаев 1916-1919 ийлаште Советск оласе (1918 ий марте Кукарка слобода лийын) учительский семинарийыште тунемын. 1917 ий сентябрь тылзыште слободаште эртыше Виче кунемысе марий-влакын (Марий ушемын) погынымаштыже 17 ияш рвезе погыным почмо годым саламлыме шомакым ойлен! Тиде погынымашым П.П.Глезденёв чумырен.

С.Токмалаев 1919 ийыште комсомол радамыш да Советск оласе семинарийыште РКСМ ячейкын секетарьжылан пашам ыштен, Советск оласе РКСМ комитетын членже лийын. 1919 ийыште 19 ияш рвезе Яранск уездысе национальность-влакын пашашт шотышто пӧлкам вуйлатен. Тиде сомылым тудо 1920 ий сентябрь тылзе марте шуктен. Вара ик жап Вятка губернийын национальность-влак шотышто марий секцийын вуйлатышыжын алмаштышыже лийын.

Москошто Свердлов лӱмеш да Эрвел пашазе-влакын коммунистический университетыштым тунем лекмек, 1922-1924 ийлаште Марий Автономный областьын совпартшколжын учебный часть вуйлатышыже да лекторжо лийын. 1924-1926 ийлаште Крупская лӱмеш коммунистический воспитаний академийыште шинчымашым нӧлтен.

Вара, 1926-1927 ийлаште, Новороссийск совпартшколышто политический экономикым туныктен. 1927-1928 ийлаште ВКП(б) Вятка Губкомын шагал чотан калык-влак шотышто (нацменьшинство) подотделжым вуйлатен. Ик фотошто – лачак тиде жапыште Вяткыште чиновник-влак войзалтыныт. Вара угыч коммунистический воспитаний академийыш пӧртылеш да экономике пӧлкам «Комвузышто политический экономикым туныктышо» квалификаций дене пытара. Тыштак туныктышо семын ышташ тӱҥалеш. 1930 ий февраль гыч 1932 ий ноябрь марте ончыч ассистент, а вара политэкономийым туныктышо

доцент лиеш. Тыгодымак заочный комвоспитаний академийын предметный комиссийжым вуйлатен. 1932-1935 ийлаште общественный наукым туныктышо-влакым ямдылыше Коммунистический университетыште политический экономий дене доцент, тунамак кастен тунемме Коммунистический университетыште политэкономий кафедрым вуйлатен.

1935 ий гыч 1939 ий марте Москосо историй, философий да сылнымут институтышто доцент лийын, 1928-1939 ийлаште театр искусство шотышто Кугыжаныш институтышто политэкономий кафедрым вуйлатен. Кугу совет энциклопедийым ямдылымаштат надырже аклаш лийдыме. Ты сомылым тудо 1937-1939 ийлаште шуктен.

1939-1941 ийлаште ВКП (б) МК-н «Пропагандист» журналжын ответственный секретарьжын алмаштышыже да теоретический отделым вуйлатыше лийын. 1941 ий июль тӱҥалтыштак Калык ополченийыш возалтын да Касвел фронтыш кредалаш каен. Тиде ийынак ноябрь тылзыште Нарофоминск воктене нелын сусырген, госпитальыште кужун эмлалтын. 1942 ий март гыч август тылзе марте Йошкар Армийын продовольственный снабженийже шотышто Тӱҥ управленийжын начсоставым туныктымо Рӱдӧ курсыштыжо социально-экономический циклым туныктен. Тиддеч вара социально-экономический циклым Рязаньысе пулемётный училищыште вӱден (1942 ий август – 1944 ий март).

Армий гыч демобилизоватлалтмеке, 1944 ий апрель гыч 1946 ий октябрь марте ВКП(б) ЦК пелен партийный организатор-влакын Кӱшыл школыштышт полтиэкономий кафедрын вуйлатышыжын алмаштышыжлан ыштен. 1944 ийыште «Советская энциклопедия» шанче институтын кугурак шанче пашаеҥжылан тыршен. 1946 ий гыч КПСС ЦК пеленсе Кӱшыл партийный школышто политэкономий предмет дене доцент лийын.

1921 ийыште ВЛКСМ (РКСМ) радамыш, а 1922 ийыште ВКП(б) (КПСС) радамыш пурен.

Кугу Отечественный сарыште кредалмыжлан «За оборону Москвы», демобилизаций деч вара уло вийым пуэн ыштымыжлан «За доблестный труд в Великой Отечественной войне», вузлаште педагог семын тыршымыжлан «Почёт знак» орден дене палемдалтын.

Марий кундемланна 100 ий темме годым ме тудын МАО-со совпартшколым вуйлатымыжым гына огыл шотыш налына. Савва Фёдорович туныктымо да шанче паша дене пырля шке марий землякше-шамычланат тӱрлӧ шотышто шагал огыл полшен шоген. Марий-влак кокла гыч Кӱшыл партийный школыш тунемаш пурышо-шамычланат ӱшанле эҥертыш лийын.

Теве тыгай чолга еҥ нерген ынде материалым Пыжанью тоштерыштат верешташ лиеш.

Сотнур Лайд ден Владимир Унженин ямдыленыт.

Снимкылаште: Вятка — 1928 ий (С.Ф.Токмалаев ӱлыл радамыште шола гыч кумшо).; Марий тӱвыра пашаеҥ-влак, Вятка — 1921 ий (С.Ф.Токмалаев ӱлыл радамыште шола гыч кокымшо, П.П.Гледенев воктене шинча).

С.НОСОВА

Опубликовать в Одноклассники

Добавить комментарий