ТАЧЕ ЯЛЫШТЕ

«Киярым шошымак кочкына»

Казаньыште илыше марий НКА-н председательже  Людмила Мусихина моткоч сай озавате. Тудын пакчаштыже кок теплице уло. Тушто киярым, помидорым, редисым, петрушкым, укропым, молымат шында. Людмила Ивановна тений 24 майыштак ешыжым свежа кияр дене сийлен.

Пакчасаска писынрак кушшо да шужо манын, ӱдырамаш ик теплицыштыже компостный лакым ышта, перегнойым опта. Вес теплицыже электричестве полшымо дене ырыкталтеш, сандене тушко росотам эше 20 мартыштак луктеш.

— Нӧшмым, росотам иканаште луктын ом шынде. Эн ончыч иктым, вара весым. Тыге свежа киярым, помидорым, укропым теле марте кочкына манаш лиеш. Редисым теве кокымшо гана ӱденам. Удобренийлан кайык терысым, ломыжым, мӱйымат кучылтам. Мутат уке сай мӱйжымак огыл, банке пундаште кодшым але тошто карашым. Сайрак кушшо манын леве вӱдым шавем, марганцовкымат ешарем, — умылтарыш  Л.Мусихина.

Л.ШАБДАРОВА.

Снимкыште: Л.Мусихина свежа пакчасаска дене ешыжым шошымак сийла.

Опубликовать в Одноклассники

Добавить комментарий