Кужэҥер посёлкышто Германийыште совет войскам негызлымылан 75 да Варшавский договорлан 65 ий темме лӱмеш шарныктышым почмо.
Тиде кече районын илышыштыже кужу жаплан шарнымашеш кодеш. Райрӱдын уэмдыме паркыштыже (тудым «Тачысе илышлан келшен толшо ола кумдыкым тӱзатымаш» федерал программе почеш кок ий почела сӧрастареныт) тиде мероприятийыш Кужэҥер, Шернур, У Торъял, Советский районла, Йошкар-Ола гыч Германийыште, тыгак моло йот эллаште службым эртыше ветеран, мер пашаеҥ, кадет-влак погыненыт ыле.
Митингым почмеке, эн ончыч мут Кужэҥер районым вуйлатыше, депутат-влак погынымашын председательже О.Фокиналан пуалтеш. Тудын мутшо почеш, кодшо курымын кудлымшо ийлаштыже ача-ава, коча-кова-влакын кидышт, тыршымышт дене ыштыме паркыште Кугу Отечественный сарыште кредалше-влак лӱмеш почмо мемориал пелен ынде нылымше тыгай шарныктыш почылтеш. Активист-влакын тыршымышт дене ыштыме тиде обелиск самырык-влакым патриотически воспитатлымаште, духовно-нравственный шӱлышеш ончен куштымаште кугу рольым шукташ тӱҥалеш.
Мемориал кӱм почаш почетан права Кужэҥер район вуйлатыше О.Фокиналан, Германмийыште совет войска-влакын группыштын да Варшавский договор почеш моло эллаште службым эртыше ветеран-влак обществын председательже Н.Киселевлан, ветеран-влак В.Трофимовлан да М.Варсеговлан пуалтеш.
Шарныктышым почмеке, ветеран Н.Киселев ойлыш. Тудо тыгай шарныктышым почмаште тыршыше-влаклан тауштен ойлыш. Вара Кужэҥер военный комиссариатын призыв шотышто отделенийжын начальникше А.Ивановлан мут пуалте. Тудо палемдыш: 75 ий жапыште Германийыште 8,5 миллион совет еҥ службым эртен, 1985 ийлан Варшавский договор организаций-влакын вооруженный вийышт радамыште 7,5 миллион салтак ден офицер шотлалтын. Вара тудо ветеран-влаклан «75 лет группе войск в Германии» медальым кучыктыш. Тылеч посна икмыняр еҥ «75 лет советской гвардии» медаль дене палемдалтын.
Германийыште совет войска-влакын группыштын да Варшавский договор почеш моло эллаште службым эртыше ветеран-влак обществе председательын алмаштышыже Ю.Ямбатров митингыште ойлышыжла йот эллаште служитлыше-влакын рольышт нерген каласкалыш. Тыгай службыш еҥ-влакым ойырен гына налыныт да совет салтак ден офицер-влак шке долгыштым тичмашын шуктеныт, элнан лӱдыкшыдымылыкшым арален кодышаш верч чот тыршеныт.
Шарныктышым почмаште тыгак ветеран Ю.Грязин, пошкудо районла гыч толшо делегаций член-влак ойлышт. Моло районлаштат тыгай шарныктышым почаш кӱлмӧ нерген ушештарышт.
Мемориалым ямдылымаште да почмаште кугу чолгалыкым ончыктышо Ю.Ямбатров тыге ойлыш:
— Шарныктышым почмаште ветеран-влакын полышышт, надырышт изи огыл лийын. Кажныж деч кок тӱжем теҥге дене погымо. Ончычшо Германийыште совет войска-влаклан 70 ий темме лӱмеш пайремыш икмыняр ветеран гына погыненна ыле. Шкенан район гыч веле огыл, пошкудо районла гычат толыныт. Туштак тыгай мемориалым почаш кӱлмӧ нерген кутырен келшышна. Вара ты шонымашым шукташ активист-влакым ушенна. Теве таче, вич ий гыч, мемориалым почаш чумыргенна. Тау, кӧ тиде шарныктышым почаш полшен.
В.СМОЛЕНЦЕВ
Авторын фотожо
