Марий Элым вуйлатыше Александр Евстифеев черетан совещанийыште Волжск олам вияҥдыме да тӱзатыме йодышлам тарватен.
Эн ончычак Чапаев уремысе канализаций коллекторышто аварий лийме деч вара олмыктымо пашан могай йыжыҥыште улмыжым рашемден. 11 августышто Марий Эл правительствын резерв фондшо гыч тидлан 8 млн. теҥгем ойырымо ыле.
«Смете документацийыште ончыктымо чумыр пашан пеле утларак ужашыжым ыштыме. Моло веч йоген толшо вӱд чаракым ышта. Подрядчик чыла пашам палемдыме жап дене келшышын шукта, тудлан оласе «Водоканал» полша. Коллекторым контрактыште ончыктымо семынак 15 октябрь марте олмыктен шуктена», — манын Волжск ола округын администрацийжым вуйлатышын пашажым шуктышо Алексей Веселов.
Волжск олаште тыгак ынде ятыр жап 5-ше №-ан школын кокымшо черетшым чоҥат.
«Объектым чоҥен пытарыме. Шукерте огыл пытартыш электромеҥгым шогалтыме, кызыт кумдыкым тӱзатена. Кондымо мебель ден оборудованийым поген, классла еда вераҥдена», — йодышым рашемден А.Веселов.
А.Евстифеев Волжскышто илыше-влакын кушкыл торым начарынрак погымылан вуйым шиймыштым палемден. Мэрын пашажым шуктышо тидын дене келшен, но вуйшиймашын лачшымак кушкыл тор, а пеҥгыде коммунал шӱкшак дене огыл кылдалтмыжым палемден.
«Чистый город» ООО-н директоржо Олег Богатовын мутшо почеш, предприятий Волжскышто пенгыде коммунал торым ынде идалыкат пеле жап пога. Тидланже олаште 445 евроконтейнерым шынден, 5 единице техникым налын.
Совещанийыште идалыкын пагытше дене кылдалтше торым «Чистый город» ООО-н вийже дене лукташ кутырен келшыме.
Марий Элым вуйлатышын организаций да
аналитике виктемжын уверже негызеш
М.ИВАНОВА ямдылен
