Марий автономийым ыштымылан 100 ий теммылан пӧлеклалтше кум теҥгеаш ший оксам Российын Банкше луктын манын возенна ыле. Тыгай оксаже але марте лийын огыл. Кодшо кечылаште регион вуйлатыше А.Евстифеев Россий Банкын Волго-Вятский Тӱҥ управленийжын пӧлкажын -Марий Элыште национальный банкын — управляющийже Николай Жуков дене вашлийын. Тунамак у оксан презентацийже эртен.
Кум теҥгеаш ший оксам Санкт-Петербургысо монетный дворышто ыштен луктыныт. 925 пробан ший гыч ыштыме окса 31,1 грамм нелытан. Палемден кодыман, оксан дизайнжым ыштымаште банкын пашаеҥже-влак дене пырля Марий Эл правительствын еҥже, мемнан сӱретче-шамычат тыршеныт. Тидлан Николай Жуков регион вуйлатышылан тауштен ойлен. Оксам кум тӱжем экземпляр дене гына луктыныт. Санденжат, коллекционер ден кумылан-влакат тудым налын кертышт манын, Николай Жуков регион вуйлатыше деч банк -партнер-влаклан оксам ешарен лукташ разрешенийым йодын.
Ший оксаште марий калыкнан ойыртемалтше улмыжым ужына. Мел могырыштыжо Россий кугыжанышын гербшым вераҥдыме. Оксан диаметрже -39 сантиметр. Тупынь могырыштыжо марий вургемым чийыше шӱвырзым да куштышо ӱдырамашым шекланена, а кӱшыл ужашыштыже марий тамгам келыштарыме.
«Окса пеш мотор лектын. Кундемнан лӱмгечыжым палемдыме марте 50 кече наре гына кодеш, санденжат тудым калыкыште шараш пеш келшен толшо пагыт, — палемден А.Евстифеев.
Марий Эл Республик вуйлатышын Оранизаций да
аналитик виктемжын уверже негызеш
С.НОСОВА ямдылен
