Республикысе социальный тӧнежлаште тыршыше 850 утла еҥ «петырыме» режимыште пашам ыштымылан кумылаҥдыше выплатым налын, палемден оперштабын заседанийыштыже регионын социальный вияҥмаш министрже Марина Островская.
Министрын мутшо гыч, социальный обслуживанийын стационар организацийже-шамыч у коронавирус инфекций дене черланыме деч аралалтме пашам февральыштак тӱҥалыныт. А апрельыште «петырыме режимыш» кусненыт.
«Тунам ме тыгай паша радамыш ик эн ончыч куснышо регион лийынна», — палемден М.Островская.
Социальный аралымашын 12 тӧнежше – «Сосновая роща» ден Карлыган интернат-пӧрт, «Таир», Шоя-Кузнецово, Красный Стекловар, Кундыштӱр, Красногорский, Кожласола, Пектубаево психоневрологический интернат-влак, Савино йоча пӧрт, ийготыш шудымо-шамычлан палемдалтше Волжск оласе да «Журавушка» социально-реабилитационный рӱдер-влак – 15 апрель гыч икте почеш весе «петырыме режимыш» куснен. Тушто 889 еҥ 14 кече дене пашам ыштен.
Министрын мутшо гыч, коронавирусын пандемийже пагытыште социальный услугым налше 12 еҥ черланен, тыгодым петырыме тӧнежлаште 2300 утла граждан ила.
«У коронавирус инфекцийын шарлымыж деч кучылтмо мере-влак сай результатым ончыктеныт манын шонена. Тӧнеж-влакын пашаеҥышт посна улмо пагытыште лӱмын келыштарыме пӧлемлаште маленыт, яра кочкыныт. Тыштыже спонсор-влакын поро кумылыштым палемдыман», — манын М.Островская.
1 сентябрь гыч чыла тӧнежым ончычсо паша радамыш кусарыме, но тыгодым тушко ӧрдыж еҥ-влакым ончычсо семынак огыт пурто. Санитарно-эпидемиологический мероприятий-влакым чыла вере ик семын да тичмашын шуктат: зданийыш пурымаште «яндар зоным» ыштыме, илышыш «маске режимым» шыҥдарыме, пашаеҥ ден социальный услугым налше-влакын капкыл температурыштым висат, помещенийлам кажне кок шагат гыч дезинфицироватлат.
Министр кумылаҥдыше выплате шотышто поснак радамын каласкален. Тудым чыла 889 пашаеҥ налын. Выплатын чумыр суммыжо 79 млн.теҥгеш шуын.
«Икмыняр мутым социальный обслуживанийын комплексный да социальный полышым пуымо рӱдерже-влакын пандемий пагытысе пашашт нергенат ойлынем. Чыла тиде жапыште мӧҥгыштӧ обслуживатлыше службо «штатный» манме режимыште пашам ыштен. Социальный услугым тымарте налше-влак деч посна ме эше 100 у получательым обслуживатленна, илалше-шамычлан кочкыш продуктым, эмым, кӱлешан арверым мӧҥгышкыштак намиен пуэнна. Пандемий пагытыште эртаралтше #МеПырляУлына всероссийский акцийын «Продукт полыш» проектше кышкарыште комплексный рӱдер-влакын пашаеҥыштат кочкыш наборым адресат деке намиен пуымо пашан ужашыжым шке ӱмбакышт налыныт. Тунам социальный пашаеҥ ден волонтёр-шамыч, ола ден район администрацийлан еҥышт 20 232 продукт наборым тӱнен илыше, 65 ий деч кугурак граждан-шамычлан мӧҥгышкыштак намиен пуэныт», — рашемден Марина Островская.
Марий Элым вуйлатыше Александр Евстифеев республикын социальный вияҥмаш министерствыжлан социальный обслуживанийын организацийлаштыже у коронавирус инфекций шарлыме деч палемдалтше мероприятий-влакым умбакыжат шуяш кӱштен. Регионыштына санитарно-эпидемиологический сӱрет начаремме годым, Роспотребнадзорын Марий Элысе виктемже дене кутырен келшен, социальный обслуживанийын стационар организацийже-влакым «петырыме» паша режимыш кусараш темлен.
Марий Элым вуйлатышын организаций да
аналитике виктемжын уверже негызеш
М.ИВАНОВА ямдылен
