Лишыл жапыште Марий Элыш коронавирус деч вакциным кондат. COVID-19 деч прививкым эн ончычак медицине пашаеҥ-влаклан ыштат, манын оперштабын заседанийыштыже регионын тазалыкым аралыме министрже Марина Панькова.
«Вакцинын икымше партийжым, 588 дозым, медицине пашаеҥ-влаклан кучылташ палемдыме. Тачысе кечылан республикыштына ковид дене 700 утла медпашаеҥ черланен. Вакцинын шке йодмашыже уло: тудым 18 градус йӱштыштӧ кучыман да пӧлемысе температуран верыште шулыктарыме деч вара айдеме оранизмыш 30 минут жапыште врачын эскерымыж почеш колтыман. Прививкым ыштыме деч вара пациентым 30 минут эскерыман. Кум арня гыч вакциным эше ик гана колтыман. Прививкым 18 гыч 60 ияш марте граждан-влаклан гына ышташ лиеш, тыгодымжак пациентын хронический черже-шамычым шотыш налман. Республикыштына вакциным аралаш чыла йӧн уло», — манын министр.
М.Панькован мутшо гыч, республикыштына COVID-19 дене черланыше пациент-шамычлан медицине полышым пуаш шым медицине организацийыште 535 койкым кодымо: 1 август гыч 190 койкым ончычсо паша радамыш пӧртылтымӧ, 17 августышто – эше 85 койкым. 16 сентябрьыште коронавирусан пациент-влаклан ойырымо койко фондын 68 процентше айлыме лийын.
«Пытартыш кок арняште стационарыш эмлалташ пыштыме черле-влакын чотышт 27 процентлан кугемын, сандене койко-шамычым ончычсо паша йогынышкышт, рашемденрак каласаш гын, калыклан медицине полышым план почеш пуымо радамышкышт пӧртылтымым чарнышна. Черле-влак Йошкар-Олаште, Волжскышто, Медведево, Волжский да Курыкмарий районлаште поснак шукын улыт. Стационарыш эмлалташ толшо калыкын чотшо сентябрь мучаш гыч октябрь кыдал марте кугемын кертеш манын шонена. Тидыже ОРВИ чер денат чак кылдалтын. Тыгай шонымашат уло: клинике велым грипп ден ковид икте-весышт деч нимо денат огыт ойыртемалт, сандене официальный диагностике тест системе кӱкшытыштӧ эртаралташ тӱҥалеш.
Прививкым кажнылан ыштыкташ пайдале. Шымлымаш рашемден: грипп деч вакцинироватлалтше пациент-влак ковидын неле формыж дене огыт черлане», — палемден М.Панькова.
Грипп деч вакцинын кокымшо партийжым Марий Элыш 31 октябрь марте кондышаш улыт.
Республикыштына ИВЛ-аппаратым 70 процентлан ситарыме. Сентябрь мучаште эше 40 оборудованийым кондышаш улыт. Тылеч посна Россий Федерацийын Тазалыкым аралыме министерствыже 10 аппаратым чылт яра колтышаш.
Россий Минздрав дене ыштыме соглашений кышкарыште республикышкына инвазивный экстракорпоральный мембранный оксигенацийым эртарыме аппаратым кондымо. Тудым Йошкар-Оласе больницыш шындыме.
«Медпашаеҥ-шамычым чарныде туныктена. Таче кечылан 1319 еҥым ямдылен шуктенна. 21 сентябрь гыч 4 октябрь марте «Сосновый бор» санаторийыште эше 58 медик канаш тӱҥалеш. Тыланда, Александр Александрович, тазалыкым пеҥгыдемдаш тыгай сай йӧным ыштымыланда медпашаеҥна-влак деч тау», — докладшым мучашлен Марина Викторовна.
Марий Элым вуйлатыше Александр Евстифеев республикын Минздравшылан калыкым у коронавирус инфекций деч иммунизироватлыме йодышлан кугу тӱткышым ойыраш, тыгак респираторный черын этиологийжым рашемдашлан грипп да ОРВИ дене черланыше-шамычым тергыме шотышто мере-влакым шукташ, биоматериалым налаш диагностический лабораторийлашке наҥгаяш кӱштен. Тылеч посна министерствылан респираторный черын шарлымыж пагытыште медицине организаций-влакын паша радамыштым палемдашыже кӱлеш.
Марий Элым вуйлатышын организаций да
аналитике виктемжын уверже негызеш
М.ИВАНОВА ямдылен
