Туныктымо пашаште нелылык уке

16 сентябрьыште Марий Элым вуйлатыше Александр Евстифеев Республикыштына у коронавирус инфекцийым кондымым да шаркалымым шижтарыме шотышто оперативный штабын черетан заседанийжым эртарен.
Роспотребнадзорын Марий Элысе виктемжым вуйлатыше Светлана Булатован палдарымыж гыч, регионна туныктымо пашам эпидемиологический нелылык деч посна тӱҥалын. Республикыштына COVID-19 дене тӱшкан черланыме лӱдыкшӧ верым пытартыш жапыште рашемдыме огыл, но эпидемий ваштареш виктаралтше мере-влакым садак шукташ кӱлеш.
С.Булатова йочасад, «петырыме» йоча тӧнеж да школысо пищеблок пашаеҥ-влакым тестироватлыме пашан сай велжым палемден.
«Тергыме годым коронавирусым кондыштарыше 23 еҥым рашемдыме. Тыгеракын коллективлашке инфекцийым пуртен кертме лӱдыкшым кораҥдыме. Чыла 23 еҥ черын нимогай клиникыжым шижын огыл», — увертарен ведомствым вуйлатыше.
Тичмаш налмаште Марий Элыште COVID-19 дене кылдалтше сӱрет сай, пытартыш жапыште гына у коронавирус инфекций дене черланыме случайын чотшо изишак кугемын.
«Тидыже эн ончычак граждан-влакын сентябрь тӱҥалтыш гыч чыла вере гаяк коштмышт да тыгодым лӱдыкшыдымылык мерым шуктыдымышт дене кылдалтын. Инфекций чӱчкыдынжӧ, 55 процент случайыште, ешыште да лишыл еҥ-влак коклаште шарла», — палемден С.Булатова.
Виктемым вуйлатышын мутшо гыч, у коронавирус инфекций дене черланымым рашемдыме 6 случай курорт гыч пӧртылшӧ-шамыч дене кылдалтын.
Коронавирусын пандемийже пагытыште республикын лабораторийлаштыже чылаже 128 тӱжем утла шымлымашым эртарыме.
Тений кылмен черланыме сезонышто респираторный вирус, гриппын да COVID-19 инфекцийын вирусышт ик жапыште шарлен да шуко нелылыкым вияҥден кертыт. Сандене кызыт калыкым чыла вере гаяк грипп дечын вакцинироватлат.
А.Евстифеев республикысе кок вузын ректорышт деч йот студент-шамычын Марий Элышке тунемаш пӧртылмышт дене кылдалтше пашан кузерак кайымыж шотышто йодыштын.
Моло эл дене авиасообщений-влакым кораҥдымылан кӧра шошым мӧҥгышкышт кайыше йот студент-шамыч регионышкына эше пӧртылын огытыл. Республикыш толмекышт, нуно ончыч обсерваторышто карантиныште лийыт, тылеч вара веле тунемаш тӱҥалын кертыт, вашештеныт вузлам вуйлатыше-влак.
Эпидемий ваштареш виктаралтше ешартыш мере-влакым илышыш жапыштыже пурташ манын, заседанийыште Роспотребнадзорын Марий Элысе виктемжылан калыкын грипп, ОРВИ, ковид, тыгак пневмоний дене черланымыжым чарныде эскераш, тыгак пашам ышташ тӱҥалше объектлаште эпидемий деч палемдалтше мероприятийлам шуктымо да коронавирус дене черланыме шотышто мониторингым умбакыжат эртараш темлыме.