2020 ий мучаш марте Йошкар-Олаште кок проблемный манме пӧртым чоҥен шуктышаш да ондалалтше дольщик-шамычын праваштым пӧртылтышаш улыт.
Йошкар-Ола мучко коштын савырнымыж годым Марий Эл вуйлатыше Александр Евстифеев Красноармейский ден Первомайский уремлаште чоҥен шуктыдымо илыме пӧртлам ончен лектын.
Тыге, мутлан, «Оршанский» микрорайонышто 84 пачеран пӧртым долевой чоҥымаш шотышто 31 ойпидыш ышталтын. 10 августышто «Казанский посад» ООО у застройщиклан тиде объектым ыштен шукташ разрешенийым пуымо. Тиде чоҥышо организацийын вуйлатышыже Руслан Муталиевын палдарымыж почеш, тушто пашам шуктымо качествым тергеныт да тудын иктешлымашыж почеш кӱварым рончаш, шокшым пуышо, вӱд пуч, канализаций системылам кораҥдаш мутланен келшеныт. Кызыт чыла тиде паша шукталтеш, тыгак вентиляций системе вераҥдалтеш. Идалык мучаш марте тыште еҥ-шамычлан пачерым ыштен шуктышаш улыт.
Республик вуйлатыше Гомзово микрорайонышто Анциферов-Красноармейский уремла ушнымаште верланыше 106 пачеран пӧртым чоҥымо кокымшо черетшым ончен савырнен. Тушто 5 еҥын праваже пудырталтын. Июль мучаште застройщиклан объектын реконструкцийжым ышташ разрешений пуалтын да тушто паша уэш шукталташ тӱҥалын. Кызыт 4-ше пачаш нӧлталтеш. «ПМК-9» ООО-н генеральный директоржо Алексей Яковлев тиде пӧртым идалык мучаш марте чоҥен шукташ тыршена манын сӧрен.
— Ондалалтше дольщик-шамыч дене кылдалтше йодыш шотышто ме ӱмаште чотак пашам ыштенна. Ондалалтше-влак шукын лийыныт – 117 еҥ. Нунын шотышто ынде йодыш рашемдалтын. Кызыт Анциферов да Первомайский уремлаште тыгай пӧрт-влак «тӱжваке лектыныт». Туге гынат кок вережат пашам чулымын шукташ тӱҥалыныт, — каласен Александр Евстифеев.
Тудо палемден: пӧрт-влакым чоҥен шуктышт, воктенысе кумдыкым шотыш кондышт да еҥ-влак шке у пачерышкышт илаш куснышт манын, республикын правительствыже застройщик-шамычлан организационный да юридический полышымат пуа.
Марий Эл вуйлатышын организаций да
аналитике виктемжын уверже негызеш
Л.КАМАЛЕТДИНОВА ямдылен
