МАРИЙ ТӰНЯ УВЕР ЙОГЫН

Кечывалвелнат «Элнет» уло

Севастопольышто Славян тиште ден тӱвыра кече эртен. Тудын кышкарышкак вучыдымын Марий тӱвыра кечат «пурен» манаш лиеш. Тиде кечылаштак тушто илыше марий-шамыч деке лӱмын унала Марий Эл гыч делегаций миен. Но тидланже вес амал лийын…

Мемнан делегацийым Российысе марий-влакын калыкле-тӱвыра автномийыштын ончылъеҥже Лариса Яковлева вуйлатен. Нунын коклаште республикысе Марий тӱвыра рӱдерын еҥже, лӱмлӧ кидмастар, тӱрызӧ да молат лийыныт. Мероприятийыште марий-влаклан шке койышыштым, мастарлыкыштым, ыштыш-кучышыштым ончыкташ йӧн лийын. Санденак славян калык тӱвыра пайремыштат меман-влак тушто илыше-влакын шинчашкышт логалде кертын огытыл.

Шочмо кундем гыч мийыше марий-влакым Севастопольышто илыше землякна-шамычат шокшын вашийыныт. Туштат 1000 наре марийым ушышо «Элнет» мер-тӱвыра общество уло. Тыгак Крымысе марий-влак шкеныштын региональный автономийыштым ыштеныт. Утларак чолгаже 100 нарыш погына. Лач нунылан Марий эл гыч мийыше-влак «Угинде» калык йӱла пайремым модын ончыктеныт. Мурымаш-куштымаш коклаште марий тӱр, вӱдуа гыч тодмо арверым, марий кочкышым ыштыме шотышто мастар-класс-влакым Лидия Веткина, Виталий Кудрявцев, Галина Волкова эртареныт. Пошкырт кундем гыч Василий Ибулаев олым шиялтышым ышташ туныктен.

Мутат уке, чыла тидыже тушто илыше марий-влак шочмо калыкын йӱлаштым, тӱвыраштым ынышт мондо манын ышталтын. А нуно чынжымак марий улмыштым шарнат. Таклан огыл уна-влакым у пырче гыч йоҥыштымо ложаш гыч кӱктен лукмо кинде, моло йорвар, свежа пура дене вашлийыныт. Марий йӱла пайремыште тыгак мордва, чуваш, эстон-влакат толыныт.

Каласен кодыман, ты мероприятийым Российысе марий-влакын калыкле-тӱвыра автономийышт Севастополь оласе марий-влакын «Элнет» мер-тӱвыра обществыжын йодмыж почеш Национальсть-влакын пашашт шотышто федеральный агентствын полшымыж дене эртарен. Куанен да кугешнен палемдыде огеш лий: Российысе марий-влакын калыкле-тӱвыра автономийышт тенийлан тӱрло мероприятийым эртараш Национальность-влакын пашашт шотышто федеральный агентствын увертарыме конкурсыштыжо шке программыж дене сеҥшыш лектын да 3,5 миллион теҥгем модын налын. Автономий вуйлатыше Лариса Яковлеван ойлымыж почеш, тенийлан 8

мероприятийым эртараш палемдыме. Кеч пандемий ты программыш вашталтышым пуртен, мероприятий-влак жап шот дене шеҥгакрак шӱкалалтыныт. Икымше мероприятий сентябрь тӱҥалтыште республикыште илыше тӱрлӧ калыкын представительже-влакым чумырен ыле да «Территория согласия» маналтын. Кокымшо мероприятий лачшымак Севастопольыштет эртен. Идалык мучаште автономийын отчет да сайлымаш конференцийже, «Марий мотор ӱдыр» межрегиональный конкурс, марий йоча-шамычлан У ий кож воктене эртарыме пайрем да молат лийшаш улыт. Тыгак Андрей Чемышевын виртуальный тӱнялан марий синтезаторым ыштыме пашажымат организаций финансироватлаш шона. Но агентствын условийже почеш, чыла палемдыме мероприятийым автономийын еҥже-влак тиде ийынак эртарен шуктышаш улыт.

Эшежым тений федеральный кӱкшытан ты мер организацийлан 1декабрьыште вич ий темеш. Шке жапыштыже тудым Одо кундемысе да Санкт- Петербург ден Ленинград областьысе марий-влакын региональный автномийышт учредитленыт гын, тачысе кечылан тыгай региональный автономийже индеше нарат погынен. Нунын коклаште чак кыл ышталтын. Лариса Николваевнан ойлымыж почеш, кажныже йол ӱмбаке пеҥгыдын шогалын. Мутлан, Ленинградысе марий-влакын автономийыштмак налаш. Мотокч чолган пашам ыштат, тусо вуйлатыше-влак денат кылышт пеҥгыде, грант проект конкрслаштат сеҥат. Алтай кундемысе, Севастпольысо марий-влакымат мокталтыман. Мутлан, кызыт гына Севастополь гыч пӧртылмеке, Лариса Николавналан тусо марий общество вуйлатышын алмаштышыже Роза Садовина тыгай шомак-влакым возен колтен: «Тау тыланда чылалан. Те мыйын кумылем нӧлталдында. Мый ынде утларак кыртмен пашам ышташ да шкенан Марий республикынам эшеат чотрак чапландраш тӱҥалам! Мыланем таче Санкт-Петербургысо национальность-влак пӧртын директоржо Ольга Ивановна йыҥгыртыш да мыланна, тыгак Марий Эл гыч толшо делегацийлан Херсонесыште эртыше пайремым сӧрастарымылан кугу таум ыштыш».

Марий делегаций чыжымак Славян тӱвыра пайремыште шкенжым сайын ончыктен, ӧрыктарен да пагалымашым сулен налын. Таклан огыл тушко мийыше моло делегаций-шамычат варажым марий-влакын эртарыме мероприятийышкышт погынен миеныт. Мутат уке, тидлан республикысе Марий тӱвыра рӱдерын пашаеҥже-шамычланат тауштыман, палемда Лариса Николаевна. Вет рӱдер вуйлатыше Наталья Пушкина шкежат федеральный марий автномийын исполнительный комитетшым вуйлата. Санденжат автономий ден рудер ваш келшен пашам ыштат, икте-весылан энертат.

Лариса Яковлева дене Севастополь олан губернаторжын калык паша шотышто полкажым вуйлатыше Владимир Колесниковат вашлийын да вес ийын тушко марий творческий коллектив-влакым ӱжман кугу мероприятийым

эртараш темлен. Ончыктен кодыман: Лариса Яковлева шкежат Россий президент пеленсе калык кокласе ваш кыл шотышто советын еҥжылан ышта.

Севастпольысо марий-влак дене вашлиймаш годым Российысе марий-влакын калыкле-тӱвыра автномийыштым вуйлатыше-влак тушто илыше чолга марий-шамычлан тауштымашым да шарнымашан пӧлекым кучыктеныт.

Светлана НОСОВА

Фотом В Контакте социальный сеть гыч налме

Опубликовать в Одноклассники

Добавить комментарий