Кодшо шуматкечын Татарстан Республикысе Менделевск олаште «Марий кандыра» кумшо межрегиональный этно-фестиваль эртен.
Ты пайрем тений «Татнефть» поро кумылым ончыктымо фондын ойырымо грантше кӱшеш эртен. Тудо С.Гассара лӱмеш тӱвыра полат ончылно лийын. Чылаже Марий Эл, Башкортостан, Удмурий республикыла, Киров область, Татарастанысе Мамадыш, Агрыз, Балтач, Менделеевский районла, Набережные Челны ола гыч 37 участник але 200 наре еҥ тушко ушнен.
Погынышо-влакым Менделевский район вуйлатыше Валерий Чершинцев саламлен. «Тек марий кандыра мемнан тӱрлӧ национальностян калыкнан келшен илымыже нерген ойла да вес регионлаште илыше марий-влак коклаште кылым пеҥгыдемдаш полша», — каласен тудо. Саламлымашке Татарстан Республикысе да Менделеевский марий-влакын калыкле-тӱвыра автономийыштым вуйлатыше-влак Олег Третьяков ден Геннадий Мальгин ушненыт.
Фестивальын участникше-влак марла куштеныт, калык ӥӱла-влакым модын ончыктеныт. Верысе искусство школын тунемшыже-влакын паша ончерышыт лийын. Каласен кодыман: ты районышто тачысе кечылан 1300 наре марий ила.
Марий Эл гыч фестивальыш Курыкмарий районысо «Шӹндӹр» вокальный ансамбль (вуйлатышыже Р.Капитонова), «Акпарс» студийын вӱдышыжӧ Татьяна Вилюкова, гармонист Арсений Яйцов, Партмар тӱвыра пӧрт гыч тошто куштымашым куштышо Ганна Егоркина, Шӹндӹрйал тӱвыра пӧрт гыч самырык мурызо-влак Мария ден Руслан Капитоновмыт, Козмодемьянск оласе Я.Эшпай лӱмеш тӱвыра полатын солисткыже Татьяна Вилюкова миеныт.
С.НОСОВА
