ТАЧЕ ЯЛЫШТЕ

Ынде мӧҥгӧ пелен

Морко районысо Кугу Шале ялыште илыше-влак С.Николаева ден Г.Эмакова кужу илыш корным эртеныт манаш лиеш. Эре пашаште тыршеныт. Коктынат ынде сулен налме канышыште улыт.

— Мый ӱмырем мучко дояркылан ыштенам, — каласкала Г.Эмакова. – Ончычшо «Путь Ленина» совхозышто вольыкым онченам, тышке марлан толмекемат, «Родина» колхозышто эре ушкалым лӱштенам. Дояркын пашаже йӧршынат куштылго огыл. Эрдене эр кынелман, кастенат пычкемыш марте — эреак пашаште. Резинке кем дене коштын, ынде йоллан неле. Мыняр кормажым, шӧржым кид вий дене нумалаш логалын, ынде шотленат от му. Туге гынат, паша лектыш куаным конден, илаш йӧным ыштен. Ынде сулен налме канышыште улам да яра жапемат уло. «Сурт-пече» газетым йӧратен лудам, эре подпискым ыштем. Тушто лекше оҥай материал-влакым куанен лудам, пайдале ой-каҥашлан эреак эҥертем.

Светлана Николаева гын школышто поварлан ыштен, икшыве-влаклан тутло кочкышым ямдылен. Вара Москвашке пашам ышташ коштын, ынде – мӧҥгӧ пелен.

— Мӧҥгыштат сомыл ятырак. Кочкаш ямдылыман, пӧрт кӧргым эрыктыман, вургемымат шӱалтыман, сад-пакчаштат шогылтман, теве пареҥгым лукмо пагыт толын шуын, — ойла С.Николаева. – Коклан пошкудо дене мутланен шинчаш погынена, кӧ мом колын-ужын – ваш палдарена. Вет илыш деч почеш кодмо ок шу.

 

В.СМОЛЕНЦЕВ

Авторын фотожо

Снимкыште: Г.Эмакова ден С.Николаева.

        

Опубликовать в Одноклассники

Добавить комментарий