ОБРАЗОВАНИЙ

Школ веле огыл, каныме верат кӱлеш

Лишыл жапыште Волжск оласе 5-ше №-ан школ пелен 335 веран у тунемме корпус почылтеш. Тушто Марий Элым вуйлатыше Александр Евстифеев лийын.

 Социальный могырым кӱлешан объектым чоҥымо паша шке радамже дене кая, сандене вашке тушто уроклаш ӱжшӧ икымше йыҥгыр йоҥгалтеш. Регионым вуйлатыше у тунемме корпусын физике, химий да биологий кабинетлаште, актовый да спорт заллаште лийын, йырым-йырысе кумдыкым тӱзатымым терген.

«Ме тыште кок арня ончыч лийынна. Коеш, паша сайын кая. Кызыт оборудованийлам монтироватлат, чыла вере гаяк мебельым вераҥдат, школ пеленысе кумдыкым шотыш кондат. Чылажымат жапыштыже ыштыман, вес семын лийынжат ок керт, вет йӱштӧ пагыт лишемеш. Визымше да кугурак класслаште тунемше-влак лишыл жапыште у корпусыш куснышаш улыт. Тиде объект моткоч кӱлешан, молан манаш гын тӱҥалтыш школ шуко ий пашам ышта, а кыдалаш да кугурак ийготан йоча-влак тошто оралтыштак тунемыт», – каласен Александр Евстифеев.

Тудо палемден: пытартыш ийлаште Волжск вияҥ толеш.

«Регионысо правительстве ты шотышто пашам ышта: Волжскышто стадион почылтын, коммуникаций сетьым олмыктымо, кугу йочасадым почмо, теве ынде школ нӧлталтеш, а ончыкыжым тыште эше роддомым чоҥаш палемдыме. Но ик эн пӱсӧ йодыш – оласе корно. Тудым шотыш кондаш ондак окса ойыралтын огыл гаяк гын, кызыт сӱрет вашталтын: мутлан, 2017 ийыште ты пашалан 20 миллионым пуымо, тений – 60 миллионым, ончыкыжымат тынарак лиеш. Адакшым вашке тыште ечероллер трассе почылтеш, тудымат спортым йӧратыше-влак вучат», – манын тудо.

Республикым вуйлатыше тиде вашлиймаште тыгак Волжск оласе кумдыкым тӱзатыме шотышто эн сай проектлан всероссийский конкурсын «5 тӱжем гыч 100 тӱжем марте калыкан изи ола-влак» номинацийыштыже сеҥымыжым палемден. Ты кечын тудо Тумерыште лийын, проект лач тудым уэмдыме дене кылдалтын.

«Мемнан ончылно тыгай задаче лийын – калыклан Юлыш корным почаш, тудлан тушто канаш йӧным ышташ. Окса шотышто йодыш лийын, сандене йодмашан документацийым ямдыленна. Ты шотышто мэрий сайын тыршен, а республикын правительствыже полшен. Ты йодмаш дене оласе кумдыкым тӱзатыме шотышто эн сай проектлан всероссийский конкурсыш ушненна да сеҥышыш лектынна. Проектым илышыш пурташ 80 тӱжем теҥге ойыралтеш. Тиде окса дене Тумерым уэмден тӱзаташ тӱҥалыт», – каласен Александр Евстифеев.

Олан мэрже Алексей Веселовын мутшо почеш, тиде верым верысе калык йӧрата, тышке шукын канаш толыт. Паркын кумдыкшо – 5 гектар. Тумерым уэмден тӱзатыме паша кок ийыште ышталтшаш.

Марий Эл Республикым организаций да

аналитике виктемжын уверже-влак негызеш

Г.КОЖЕВНИКОВА ямдылен

      

Опубликовать в Одноклассники

Добавить комментарий