СОЦИАЛЬНЫЙ ИЛЫШ

«Калыклан кӱлмым умылаш…»

8 июньышто социальный пашаеҥ-влак профессиональный пайремыштым палемденыт

Морко районысо Кугу Вараҥыж ялыште шочын-кушшо, тыштак еш пиалым мушо Алефтина Семелинан «Калыкым социально обслуживатлыме Морко районысо комплексный рӱдер» кугыжаныш бюджет тӧнежыште социальный пашаеҥлан ышташ тӱҥалмыжлан 18 ият лиеш. Иктылан тиде жап нимом ок ойло гын, весылан вуеш шушо ӱдырым ушештара. Алефтина Ефимовнанат социальный сферысе 18 ияш паша лектышыже куандарыше: 2008 ийыште Морко район администрацийын Чап грамотшо, 2011 ийыште Марий Эл Республик Паша да калыкым социально аралыме министерствын Чап грамотшо, 2016 ийыште «Социально обслуживатлыме тӧнежын эн сай пашаеҥже» республик кӱкшытан конкурсым иктешлыме почеш «Социально обслуживатлыме тӧнежын эн сай пашаеҥже» номинацийыште 1-ше верым сеҥен налмыжлан Марий Эл Республик Социальный вияҥмаш министерствын грамотшо, 2016 ийыштак «Калыкым социально обслуживатлыме тӧнежын эн сай пашаеҥже» Россий кӱкшытан конкурсын «Калыкым социально обслуживатлыме тӧнежын эн сай пашаеҥже» номинацийыштыже 1-ше вер дене палемдалтын.

Алефтина Ефимовна Кугу Вараҥыж, Чопак, Нуж-Ключ яллаште илыше тылын труженикшымат, пашан ветеранжымат, тӱрлӧ категорий инвалидымат, полыш деч посна кодшо, шкет илыше шоҥгыеҥымат кумылын онча, шукыштым – ятыр ий почела. Ӱдырамаш пала: шагал огыл илалше еҥлан социальный пашаеҥын тӱткышыжӧ сурт сомылкам тӧрлымӧ дечат кӱлешан да шергакан. Тидымак шотыш налын, Алефтина Ефимовна нунылан ны жапшым, ны поро мутшым ок чамане. Пытартыш кум ийыште гына нине еҥлан социально-бытовой 4973, социально-медицинский 476, социально-правовой 19, ешартыш 889 услугым пуэн. Айдемым йӧратымыже, скромный, честный, шотан, поро шӱм-чонан улмыжо, у деч уым пален налаш, тудлан тунемаш тыршымыже дене калыкыште шукертак пагалымашым сулен налын.

– Мемнан кокла гыч кажныже, кушто гына пашам ынже ыште, калыклан але посна айдемылан кӱлмыжым умылышаш. Таче мый латик илалше еҥлан кӱлам. Кугу ийготан кова ден коча-влак мыйым родышт, лишыл еҥышт семынак шӱм вургыж вучат, – пашажын ойыртемже дене палдара социальный пашаеҥ.

Ӧрдыж гыч ончалмаште илалше-шамычым ончымо паша куштылгыла чучеш, но нуным колыштын да умылен от мошто гын, тиде сферыште нимом ышташ.  Шоҥгыеҥ-влак дене келшен, ик ойыш шуын моштымыжак Алефтина Ефимовнам Москва марте шуктен. Февральыште тудым Федераций Советыште эртыше сенатор-влакын ялыште пашам ыштыше образований, медицине, культур, социальный сфер пашаеҥ-шамыч дене вашлиймашкышт республик гыч делегат семын колтеныт.

– Тиде вашлиймаште Росийын 78 регионжо гыч 205 еҥ лийын. Тунам мый моткочак пиалан улмем шижым да пашам эшеат сайын шукташ кӱлмым умылышым. Москваш миен толмо деч вара паша кумылем эшеат вияҥе, – манеш Алефтина Ефимовна.

А.Семелинан илалше-влакым ончымо опытшо кугу, сандене самырык социальный пашаеҥ-шамычлан наставник семын кумылын полша. Тылеч посна тӱрлӧ мероприятийыште участвоватла, квалификацийжым, профессиональный мастарлыкшым нӧлта. Калыкым социально обслуживатлыме тӧнеж ден район администрацийын ик мероприятийыштат тудын деч посна огыт эрте. Мӧҥгыштӧ социально обслуживатлыме отделений вуйлатыше-влак дене пырля шке кустышто эртыше семинарыште паша опытшо дене ий еда пайлалтеш, шкежат иктаж-мом уым да пайдалым кӱсынла. «Социальный пашаеҥ – профессий огыл, а чон шижмаш» теме дене презентаций ден методичкым ямдылен. «Пиал кас» клубым почын. Шеҥше селасе Тӱвыра пӧртын специалистше-шамыч дене пырля илалше-влакын коллективыштым чумырен. Илалше-влакын кечышт, Инвалид-шамычын декадышт, Ешын, йӧратымашын да ӱшанлыкын кечышт, Сеҥымаш кече гай социально кӱлешан пайремлан пӧлеклалтше мероприятий-влакым оҥайын эртара. Мӧҥгыштӧ социально обслуживатлыме отделенийын шарнымаш книгажлан салтак вате, тылын труженикше-влак нерген шуко материалым поген. «Окнаште – волгыдо» акцийыш кажне ийын чолган ушна: Кугу Отечественный сарын ветеранже-шамычлан пӧрткӧргым эрыкташ, сад-пакчам тӱзаташ полша, тиде пашашке волонтёр-влакымат кумылаҥда.

…Эр кече нӧлтынак-нӧлтеш. Сурт сомылкам тӧрлен, сай озавате, пелаш, кум шочшан ава адакат йӧратыме пашашкыже погына. Алефтина Ефимовна пала: тудым тачат молгунамсе семынак шӱм вургыж вучат… Тудат нунын деке ача-аваже деке вашкымылак ошкылеш.

М.ИВАНОВА.

 

Опубликовать в Одноклассники

Добавить комментарий