ТАЗАЛЫК

Тудым врач-шамычат, калыкат моткоч вучат

Марий Элым вуйлатыше Александр Евстифеев Перинатальный рӱдерым чоҥымо площадкыште лийын.
Азам ышташ полшымо специализироватлыме тӧнежым у кӱкшытыш лукшо кӱкшӧ технологиян у корпусым тений чоҥаш тӱҥалме. Республикланна тудо кӱлешан объект, молан манаш гын кызытсе Перинатальный рӱдер 1961-1983 ийлаште кодшо курымын 70-ше ийласе нормативше почеш чоҥымо ончычсо азам ыштыме пӧртын лӱмын келыштарыме вич зданийыштыже верланен. Медик-влак вер ситыдыме, тылеч посна нунын кумдыкышт санитарный нормо дене келшен толдымо нерген ик гана веле огыл ойленыт.
Республикыштына Перинатальный рӱдерым чоҥымо проектым илышыш пуртымо шотышто кугу паша федеральный кӱкшытыштӧ, ты шотыштак россий парламентын кӱшыл палатыжын спикерже Валентина Матвиенкон участвоватлымыж почеш Федераций Советыште кок ий лончылалтын, да тений теве вийым налын. Проектын чумыр суммыжо — 1,7 млрд. теҥге.
Марий Элын чоҥымо паша, архитектур да илыме-коммунал озанлык министрже Михаил Степановын регионым вуйлатышылан палдарымыж почеш, таче кечылан объектын чоҥымо зоныж гыч водопроводым кусарыме, улшо шокшо сетьым кораҥдыме да негыз плитам пыштыме.
Кум пачашан у зданийын чумыр кумдыкшо 4,5 тӱжем наре квадрат метрыш шуэш. Икымше пачашыште кок приёмный покой: кугыеҥлан да йочалан, тыгак азам ыштыме кум зал лийыт. Кокымшо пачашым азам ыштыме отделений ден операционный блок айлат. Кумшо пачашыште – кок реанимаций отделений: кугыеҥлан да йочалан.
Азам ыштыше ӱдырамаш ден кызыт гына шочшо аза-влаклан кӱкшӧ технологиян да специализироватлыме медицине полышым пуаш полшышо оборудований дене шыҥдарыме Перинатальный рӱдерын у копусшо медик-шамычланат, республикыште илыше калыкланат кугу событий лиеш, палемден Марий Элым вуйлатыше.
«Кызытсе Перинатальный рӱдер шаланылше вич тошто зданийыште верланен. Проблемым решатлаш да федеральный финансированийыш логалаш манын, тиде йодыш дене кум ий пашам ыштенам. Тиде нацпроектын ик пунтшо огыл, а республикыштына специальный решений да сметын 1,7 миллиард теҥгеаш чумыр суммыжо. Чоҥымо паша тичмаш куатын кая, тудо шушаш ий декабрьыште мучашлалтеш. Кызыт чоҥымо деч посна эше мыланна ойырымо оксам моштен кучылтмо пашат шукталтеш. Медицине техникым наледена, молан манаш гын шушаш ий декабрьлан тудо шергештеш. Мемнан задачына – тудым кызыт налаш да палемдыме жаплан чылажымат ыштен шукташ», — манын А.Евстифеев.
Регионым вуйлатышын палемдымыж почеш, республикыштына йоча-влакын колымо кугу чотышт тургыжландара, сандене Перинатальный рӱдерын у корпусшым тиде амал денат чоҥаш кӱлешан.
«Республикнан медициныштыже кугу проблеме лийын – Юл кундем федеральный округышто йоча колымо чот эн кугу. Тидым чыташ огеш лий, сандене ме, республикын правительствыже, тиде теме дене пашам ыштенна, да ыштен шуктенна. Врачна-шамычын профессиональный шинчымашышт ден опытышт кызытсе жаплан келшыше зданийын куатшылан, кӧргыжлан келшышын кугемыт манын ӱшанем, да йоча тазалык дене кылдалтше темым кораҥдена. Таче кызыт гына шочшо аза-влакын патологийыштым кораҥдашлан – нуным ончен лукташлан — койко шотышто нелылык уло. Чыла тиде врач-влакын вуйыштым, ушыштым да кидыштым гына огыл, технический медицине полышымат йодеш. Чыла тиде Йошкар-Олалан веле огыл, а Марий Элын чыла районжылан пашам ышташ тӱҥалше у корпусышто решатлалтеш», — ешарен регионым вуйлатыше.
Ушештарена, Перинатальный рӱдерын кӱкшӧ технологиян у корпусшым чоҥымо паша общественный советын эскерымыж почеш шукталтеш. Кӱлешан объектым чоҥымо паша вошткойшо лийже манын, тиде советым Марий Элым вуйлатыше Александр Евстифеевын тӱҥалтышыж почеш ыштыме. Тушко тӱҥ шотышто республикысе Общественный палатын еҥже-влакым пуртымо.

Марий Элым вуйлатышын организаций да

аналитике виктемжын уверже негызеш

М.ИВАНОВА ямдылен

Опубликовать в Одноклассники

Добавить комментарий