ОБРАЗОВАНИЙ

У школ – сай тӱҥалтышлан

Шинчымаш кечын Марий Элым вуйлатыше Александр Евстифеев Йошкар-Оласе 9В микрорайонышто 31-ше №-ан школым торжественно почын.

Проект почеш у общеобразовательный организацийыште  825 вер, но йоча-шукылан кӧра тений 1000 утла ӱдыр-рвезе парт коклаш шинчын.

Тиде образовательный организацийым кызытсе жаплан келшыше тунемме рӱдерлан шотлыман. Кажне йоча келге шинчымашым налже манын, чылажат ышталтын: мотор оралте, кумда да волгыдо кабинет-влак, у мебель, но тӱҥжӧ – технический базе. Занятийлаште кучылташ компьютерым, интерактивный доскам, цифран микроскопым да кӱлешан моло оборудованийым вераҥдыме. Йоча-влак ешартыш образованийым налышт манын, роботехнике кабинет, спортплощадке, каныме да модмо вер, тунемме да опытым ыштыме участке улыт.

«31-ше №-ан школ, Россий президент Владимир Владимирович Путинын тӱҥалтышыж почеш илышыш пурталтше «Образований» национальный проект дене келшышын, рӱдоласе ик эн шуко калыкан микрорайоныштыжо нӧлталтын. Тиде кечым ты кундемыште кумло ий наре вученыт, лач тынар жап Йошкар-Олаште у тунемме вер чоҥалтын огыл. Проектым илышыш шыҥдараш 267 миллион теҥгем кучылтмо. Тидын деч посна кызытсе жаплан келшыше мебельым да оборудованийым, спорт инвентарьым да молымат налаш 100 миллион теҥгем ешарен ойырымо», – туныктышо, тунемше да нунын ача-аваштым саламлымыж годым каласен регионым вуйлатыше.

Тудын палемдымыж почеш, тиде – сай тӱҥалтышлан ошкыл, ончыкыжым тыгай вашталтыш-шамыч лийшаш улыт.

«Лишыл жапыште шке омсажым Волжск оласе школын кокымшо тунемме корпусшо почеш. Тушто 336 йоча шинчымашым поген кертеш. Медведево посёлкыштат паша «шолеш». Шушаш ийын Марий Турек районысо Сардаял школ ямде лийшаш. Дошкольный образовательный тӧнежлам чоҥымо йодышланат республикын правительствыже кугу тӱткышым ойыра. Тений ныл йочасад почылтшаш. Тиде кечылаште Килемар районысо Визымйар посёлкышто 50 веран у дошкольный тӧнеж, шушаш арнян – Медведево посёлкышто, тудо 320 веран. Идалык мучаш марте Йошкар-Олаште эше кок йочасад ямде лийшаш, кажныже 320 веран», – увертарен Александр Евстифеев.

Ты кечын тудо у тунемме верын тӱҥалтыш класслаштыже, актовый залыштыже, биологий да химий кабинетлаште спортзалыште, книгагудышто лийын, икымше классыш толшо икшыве-шамычым саламлен, а туныктышо-влаклан тыге манын:

          «Тек ончыкылык выпускникда-влак умбакыже эреак кӱшыл тунемме верыште шинчымашым погышт да кызытсе жаплан келшыше тыгай школышто тунеммыштым аклышт».

          Школым вуйлатыше Евгений Николаевын мутшо почеш, туныктышо-влак коклаште кугу опытанат, самырыкат улыт. Тудо палемден: 9В микрорайонышто ятыр у пӧрт нӧлталтеш, сандене тиде школышто тунемаш кумылан-влак шукын улыт.

        «Эн ончычак лач ты кундемыште илыше-влакын икшывыштым налынна, эсогыл ешартыш классламат почаш логалын. Шуко йоча 27-ше №-ан школ гыч куснен. Тений мемнан 10 икымше класс уло», – каласен тунемме верым вуйлатыше.

         Марий Эл Республикым вуйлатышын организаций да

аналитике виктемжын уверже-влак негызеш

Г.КОЖЕВНИКОВА ямдылен.

Опубликовать в Одноклассники

Добавить комментарий