1 сентябрьыште Марий Элысе исправительный учрежденийласе школлаштат еҥ-влак парт коклашке шинчыныт.
Тыгайышт тений 200 нарын улыт, палдара республикысе УФСИН-ын пресс-службыжо. Тыгак 350 утла судитлыме еҥ кыдалаш профессионал шинчымашым налаш тӱҥалыт.
Моло тыглай тунемме заведений семынак шуркалыше кӱртньывоштыр шеҥгелне верланыше школ-влакымат августышто тергеныт. Кажныжымат келшен толшылан шотленыт.
Тунемме ий тӱҥалмеке, чыла вере семынак нине школлаштат санитар йодмаш шукталтеш. Тидлан аралалтме индивидуальный средства шапашышт ситышын уло. Тунемше ден туныктышо-влаклан лӱдыкшыдымӧ лийже манын, занятий ден практике расписанийыштым вашталташ логалын. Тыгак зданийыш кажныштын температурыштым висат, кидыштым обработатлат, пӧлем-влакым кече мучко ик гана веле огыл дезинфицироватлат.
Тений 1 сентябрьыште нине школлаште молгунамсе семын торжественный линейке лийын огыл гынат, вуйлатыше ден туныктышо-влак тунемше-шамычым у тунемме ий тӱҥалме дене садак саламленыт.
Л.КАМАЛЕТДИНОВА
