Йошкар-Оласе 1-ше №-ан поликлинике 7 сентябрь гыч грипп дечын прививкым ышташ тӱҥалеш.
Вакцинироватлалташ шонышо-влакым медицине тӧнежын 3-шо №-ан филиалыштыже (Вашский урем, 7-ше пӧрт) шочмо гыч кугарня марте вучат. Прививкым 35-ше кабинетыште 8 гыч 15 шагат йотке (12 гыч 12.30 шагат марте – кечывал каныш) ыштат.
Тылеч посна вакцинацийым Йошкар-Оласе Рӱдӧ пазарыште рушарня еда 6, 13, 20 да 27 сентябрьыште 9 гыч 13 шагат марте эртарат. Поликлиникын «1-ше №-ан поликлинике. Грипп деч прививке» манын возыман УАЗ автомобильже пазарыш Первомайский урем велым пурымо рӱдӧ омса воктене шогаш тӱҥалеш.
Прививкым ышташ мийыше-влак пеленышт паспортым, ОМС-ын полисшым, прививкым ыштыме сертификатым (уло гын) налшаш улыт.
Вакцинаций яра эртаралтеш.
М.ИВАНОВА
