ТАЗАЛЫК

Чер нигушкат каен огыл!

Республикыштына у коронавирус инфекций дене черланыме чот иземын толеш гынат, эмлымверлаште сӱрет ончычсо семынак неле: пациент-влак кокла гыч шукынжо черын келгыш пурымекыже гына медицине полышым йодын толыт!
Шарныза, посна улмаш да профилактике шотан моло мере шучко инфекций дене черланыме деч шкемат, молымат аралаш палемдалтыныт. Сандене кидым шовын дене сайын да чӱчкыдын мушмо койыш тек койыш-шоктышыштына эрелан кодеш. Тудо поснак шуко еҥ дене кылым кучымо деч вара кӱлешан.
Коронавирус эн чотшо илалше еҥ, мӱшкыран ӱдырамаш, астме, сакыр диабет гай хронический чер дене орланыше да лушкыдемше иммунитетан-влаклан лӱдыкшӧ. Сандене тиде тӱшкаш пурышо еҥ-шамычлан утларакше посна лияш да социальный дистанцийым эскераш пайдале. Нунын деке унала тарваныме годымат сайынрак шоналташ темлалтеш – вашлияш кӱлешак мо?
Эркын дене вес эллашке чекым почыт, да ынде путешествоватлаш мыняр-гынат йӧн уло. Но ида мондо: аэропортлаште да вокзаллаште тӱрлӧ регион да эл гыч толшо калык дене иквереш «шолаш» логалеш. А тидыже черланен кертме лӱдыкшын эшеат кугеммыж нерген ойла.
Шкеже огыда черлане гынат, вирусым мийыме-пӧртылмӧ верлаште шаркален кертыда. Вет тудо лачшымак тыгай йӧн дене уло тӱням авалтен. Чер кенета угыч ылыж кая, да чекым петырат гын, Юмо аралыже вес элыште кодмо деч…
Черланаш огыл, а инфицироватлалтмеке, вирусым лийме семын куштылемдаш манын, нине правилым шотыш налаш темлена:
— кылмен черланышыла койшо-влакым кораҥын коштса;
— шуко еҥ улман верлаште шагалрак лияш тыршыза;
— ик гана пайдаланыме медицине маскым чийыза, тудым кажне кок шагат гыч вашталтыза;
— тӱшкан пайдаланыме верлашке пурымо да тушечын лекме годым кидым шовын дене мушса але антисептик дене обработатлыза;
— илыме ма паша верым вӱдыжгӧ лапчык дене эрыктыза, южтарыза, южым вӱдыжтарыза;
— таза илыш-йӱлам кучыза.
У коронавирус инфекций дене черланыме деч аралалтме эн виян да ӱшанле йӧн – вакцинаций.
Шкем эскеренак шогыза! Вирусан инфекций пижмым шижмек, вигак врачын полышыжлан эҥертыза!

М.ИВАНОВА

Опубликовать в Одноклассники

Добавить комментарий